Tiri bolsam, qazaqqa qyzmet etpeı qoımaımyn!

Álıhan Bókeıhan

Almatyda SSSR qyzyl týyn julyp alǵan belsendi Janbolat Sháızada bosatyldy

15 mamyr 2024 482

9 mamyrda Almatyda Qyzyl Keńes týyn avtokólikke qadaǵan adamdardyń jalaýyn julyp alyp,olarmen shekisip qalǵany úshin 5 táýlikke qamaýǵa alynǵan Janbolat Sháızada bosatyldy.  Almaty qalalyq ákimshilik soty atalǵan azamatty "Usaq buzaqylyq" baby boıynsha 5 kúnge qamaǵan bolatyn, dep habarlaıdy Alash.KZ ulttyq portaly.

Janbolat Sháızada qamaýdan bosap shyqty. 14 mamyr keshke qalalyq polısıa departamenti aldyna belsendini kútip alýǵa 50-ge jýyq adam jınaldy.Olar Qazaq eliniń kók týyn jelbiretip, qurmetpen belsendini kútip aldy. 

Eske sala keteıik, 9 mamyr kúni áleýmettik jelide er adamnyń Almaty kóshesinde kólikke ilingen Sovet odaǵynyń týyn alyp, kóliktegi adamdarmen sózge kelip qalǵany beınelengen vıdeo tarady. Janbolat Sháızadanyń aıtýynsha, oqıǵa 9 mamyrda kúndiz bolǵan. Ol SSSR-dyń týyn jelbiretip júrýdi el birligine syna qaǵyp, "arandatý" áreketi dep sanaıtynyn jetkizdi.

Janbolat Sháızada Reseıdiń Ýkraınaǵa basqynshylyǵy osyndaı arandatýshy áreketterden bastalǵanyn atap ótip, istegen isin durys sanaıtyndyqtan oǵan ókinbeıtinin, jasaǵanyn moınymen kóterýge daıyn ekenin de habarlady.

Májilis depýtaty Abzal Quspan KSRO týymen sherýge shyqqandarǵa qarsy bolǵan almatylyq Janbolat Shaızadany qoldaýǵa shaqyrdy.

Janbolattaı ultqa tirek, elge kerek azamattardy qoldamaı tynysh otyrýǵa taǵy bolmaıdy. Sonda ne istemek kerek? Menińshe, qoldanystaǵy ákimshilik kodekske bóten, basqa eldiń memlekettik sımvolıkasyn qoǵamdyq oryndarda ruqsatsyz paıdalanǵany úshin bólek jaýapkershilik qarastyrý kerek. Sonda biz osyndaı provokasıalyq áreketterdiń aldyn alǵan bolar edik. Áıtpese, SSSR-diń týyn jelbiretip júrgenderdiń áreketi zańdy, al oǵan tosqaýyl qoıamyz deýshilerdiń áreketi zańsyz bolýy ádilettilik qaǵıdatyna qaıshy, – dep jazady ol.

Oraıy kelgende aıta keteıik, jyl saıynǵy Jeńis kúninde egemen eldiń aspanynda ózge sıpattaǵy nyshandardy kóteretinder kózge túsedi. Keńestik kezdegi ulttyq qundylyqtardyń janshylyp, ult tiliniń túgesilýi, qazaq tildi mektepterdiń jabylýy, asharshylyq pen ult zıalylaryn qýalaý syndy qıyndyqtar tán sovettik ımperıanyń saıasatyn aıyptaıtyndar bul qubylysty quldyq sanamen, otarlaýshylyqty jaqtaýmen, qazaq halqyna jasalǵan genosıtti beısana qoldaýmen baılanystyryp jatady. 

Bul maqala týraly ne oılaısyz?