Komısıa otyrysynda paıdalanylmaı jatqan aýyl sharýashylyǵy maqsatyndaǵy jerlerdi jumys istep turǵan sharýa qojalyqtaryna berý jáne negizsiz jekeshelendirilgen obektilerdi memleket menshigine berý tetikteri máseleleri qaraldy. QR aýyl sharýashylyǵy mınıstri E. Qarashókeev jerdi utymdy ári tıimdi paıdalaný jóninde baıandama jasady. Esterińizge sala keteıik, 2022 jylǵy 3 qańtarda Memleket basshysy paıdalanylmaıtyn aýyl sharýashylyǵy jerlerin májbúrlep alyp qoıý merzimin 2 jyldan 1 jylǵa deıin qysqartqan zańǵa qol qoıdy. Kosmomonıtorıng arqyly memlekettik baqylaýdyń jańa tetikteri engizildi. Paıdalanylmaı jatqan aýyl sharýashylyǵy jerlerine salyq mólsherlemesi eki ese ósti. Mınıstrdiń aıtýynsha, barlyq óńirlerde derlik jaıylym jerler óte ózekti másele bolyp otyr, alaıda 2019-2021 jyldary atqarylǵan jumystardyń nátıjesinde 8,1 mln ga paıdalanylmaıtyn nemese maqsatty paıdalanylmaı jatqan aýyl sharýashylyǵy jerleri anyqtaldy. Tıisti sharalardan keıin osy kólemnen 3,4 mln ga jer telimin burynǵy menshik ıeleri ıgere bastady. 2,1 mln ga jer memleket menshigine qaıtaryldy. Búginde 2,6 mln ga jergilikti atqarýshy organdardyń qaraýynda. Sonymen qatar 2021 jyly aýyl halqyna mal jaıý úshin jaıylym jerdiń qajettiligi 21 mln ga-dan 14 mln ga-ǵa deıin, onyń ishinde uıymdastyrylǵan sharýashylyqtarmen memorandýmdar jasasý jáne eldi mekenderdiń shekarasyn keńeıtý esebinen qysqartyldy. «Memleket basshysynyń tapsyrmasyn sapaly ári ýaqytyly oryndaý qajet. Aýyl sharýashylyǵy mınıstrligine jumysty jandandyrýdy tapsyramyn. Paıdalanylmaı jatqan aýyl sharýashylyǵy maqsatyndaǵy jerler naqty jumys isteıtinderge berilýi tıis», — dedi Álıhan Smaıylov. Sondaı-aq Komısıa otyrysynda qarjy vıse-mınıstri D. Janalınov jáne Básekelestikti qorǵaý jáne damytý agenttiginiń tóraǵasy S. Jumanǵarın ekonomıkany monopolıasyzdandyrý máselesi týraly baıandady.
QR Premer-Mınıstri Qarjy mınıstrligine múddeli memlekettik organdarmen birlesip, keıin kezekti otyrystarda qaraý úshin negizsiz jekeshelendirilgen obektilerdi qaıtarý tetikteri boıynsha taldaý júrgizip, kelisilgen usynystar ázirleýdi tapsyrdy.
