Tiri bolsam, qazaqqa qyzmet etpeı qoımaımyn!

Álıhan Bókeıhan

"Ádettegideı jumys istedim". Aıbar Qosanov İİİ dárejeli "Eńbek Dańqy" ordenimen marapattaldy

06 mamyr 2024 160

Búgin Qazaqstan Respýblıkasy Prezıdentiniń atynan Qarmet kompanıasynyń Kostenko atyndaǵy shahtasynyń jerasty ýchaskesiniń elektr slesary Aıbar Qosanovqa İİİ dárejeli "Eńbek Dańqy" ordeni tabys etildi. Marapatty Qaraǵandy oblysynyń ákimi Ermaǵanbet Bólekpaev tabystady.

"Aıbar batyrlyq tanytty jáne shahtada bolýy múmkin qaýiptiń aldyn aldy. Eńbegińiz úshin raqmet, otbasyńyzǵa, ata-anańyzǵa myń alǵys. Sizdi shyn júrekten laıyqty marapatpen quttyqtaımyn", - dep atap ótti oblys ákimi.

Esterińizge sala keteıik, 2024 jyldyń 2 mamyrynda Aıbar Qosanov Kostenko atyndaǵy shahtada 190-nan astam shahter bolǵan kenishtegi tutanǵan tútindi dereý óshirgen bolatyn.

"Bul kúni men ádettegideı jumys istedim, kenet tutanǵan jer bolýy múmkin degen aqparat keldi. Men ony kózben kórý úshin 700 metrdeı jerge júgirip bardym. Oıymda qorqynysh sezimi bolǵan joq. Barsam taspanyń tutap jatqanyn kórdim. Eshteńe oılanbastan eki órt sóndirý quralyn alyp, óshirip tastadym. Prezıdent Qasym-Jomart Kemeluly Toqaevqa, oblys basshylyǵyna joǵary marapaty úshin alǵys aıtqym keledi, bul men úshin jáne meniń otbasym úshin kútpegen jáne óte tosyn syı boldy", - dedi Aıbat Qosanov.

Ol bul marapat tek óziniń ǵana emes, sonymen qatar dıspecherlik bóliminiń jalpy sıgnal kezinde jedel jumys istegen barlyq áriptesteriniń de eńbegi ekenin aıtty. Qosanov kompanıaǵa joǵary daıyndyǵy úshin alǵysyn bildirdi.

Óz kezeginde Qarmet bas dırektory Vadım Basın kompanıa kenshiniń erlik áreketin nazardan tys qaldyrmaıtynyn atap ótti.

"Jalpy, qazir shahtalarda qaýipsizdik júıesin jetildirý boıynsha belsendi jumys júrgizilýde. Mańyzdy qadamdardyń biri Qarmet kómir nysandarynda pozısıalaý júıesin ornatý boldy. Biz qyzmetkerlerimiz úshin jer astyndaǵy eńbekti qaýipsiz etýge tyrysamyz", - dedi Basın.

Aıbar Qosanov Kostenko shahtasynda 2022 jyldan bastap konveıerlik kóterý ýchaskesiniń jerasty elektroslesary laýazymynda jumys isteıdi, buǵan deıin basqa kásiporyndarda jumys istegen. Úılengen, úlgili otbasy eki bala tárbıelep otyr.

Bul maqala týraly ne oılaısyz?