Tiri bolsam, qazaqqa qyzmet etpeı qoımaımyn!

Álıhan Bókeıhan

50 myń qol jınady: LǴBT násıhatyna qarsy petısıa Balaevaǵa joldanady...

17 maýsym 2024 262

Bir qyzyǵy, mundaı shekteýler Qazaqstannyń ımıjine nuqsan keltiredi degen belsendiler shyǵyp jatyr dep jazady Fragment. Olar petısıa avtorlarynyń bastamasyn Ata zańǵa qaıshy dep sanaıdy.

Petısıa avtorlary - Qazaqstan ata-analar odaǵy. Odaq belsendileri "Qazaqstanda LǴBT násıhatyna qarsymyz" deıtin shaǵymdy E-Petition.kz portalynda ornalastyrǵan. Azdaǵan ýaqytta 50 myń qol jınaǵan qujat bizdiń bilýimizshe, Aqparat mınıstrine joldanǵan.


Resmı petısıalardy qaraý júıesi Qazaqstanda salystyrmaly túrde sony qubylys. Osy ýaqytqa deıin tek úsh petısıa qajetti qol jınady. Sonyń biri - atyshýly Bıshimbaevtyń isi. Saltanat Núkenovanyń ólimi otbasylyq zorlyq-zombylyq týraly zańnyń qabyldanýyna alyp keldi.

Petısıaǵa uıytqy bolǵandardyń biri - Baǵıla Baltabaeva.

"Birjynysty mahabattyń jaqtastary óz qataryna jastardy tartqysy keledi. Jynystyq qatynastardyń qazaq qoǵamyna jat standarttaryn engizýge umtylady. Al dástúrli qundylyqtardy eskiliktiń belgisi dep qarastyrady",- deıdi ol.

Mundaı shekteýler Qazaqstannyń ımıjine nuqsan keltirýi múmkin degen belsendilerdiń óz argýmenti bar. Belgili femınıst Áıgerim Qusaıynqyzynyń aıtýynsha petısıa Konstıtýsıada bekitilgen negizgi quqyqtardy tabanǵa taptap otyr.

"Adamdy seksýaldy orıentıri men genderlik ıdenttiligi úshin qýdalaý quqyq buzýdyń óreskel kórinisi. Adam quqyn qorǵaıtyn elderdiń qatarynda qalǵymyz kelse, mundaı zań qabyldanbaýy kerek", - deıdi ol. Belgili advokat Halıda Ájiǵulova da belsendiniń sózin sóılep otyr.

"Mundaı bastamaǵa 50 myń adamnyń qol qoıǵany óte-móte qaýipti qubylys. Shynaıy demokratıalyq qoǵamda adamdy adamǵa aıdap salýǵa bolmaıdy..." - deıdi ol.

Fragment bul iske tórelik aıtýdan aýlaq. Dese de, qazaq qoǵamy "ǵomoseksýaldy mazmuny" bar kontenttiń eshbirin qabyldamaıtynyn túsiný kerek.

"Dástúrli emes qarym-qatynastardyń" propaǵandasymen aınalysatyn birqatar belsendilerdiń talpynystaryn qazaqtildi orta der kezinde tejep otyrdy. Aıtalyq, bıylǵy jyldyń qańtarynda LǴBT qaýymdastyǵyna arnalǵan selftanu.kz saıty "óskeleń urpaqtyń sanasyn ýlaıtyn aqparat" ornalastyrǵany úshin dereý buǵattalǵan.

Aıtqandaı, kórshi Reseıde jaqynda "LǴBT násıhatyna" tyıym salý týraly zań qabyldanyp, osy istiń basy-qasyndaǵy belsendilerge qatysty ákimshilik ister qozǵalǵan.

Bul maqala týraly ne oılaısyz?