Tiri bolsam, qazaqqa qyzmet etpeı qoımaımyn!

Álıhan Bókeıhan

5 jastaǵy balany qaǵyp óltirgen kólik júrgizýshisi marqumnyń ata-anasyn balaǵattap, kinásizbin degen

14 mamyr 2024 1517

Ata-anasy úı aýlasynda otyrǵan 5 jastaǵy balasyn qaǵyp ketken kólik júrgizýshisi jazasyz qala ma dep qorqyp otyr. Bul týraly Informburo jańalyqtar qyzmeti baıandady. 

Qaıǵyly jaǵdaı mamyrda keshki saǵat 4-ter shamasynda bolǵan. 5 jastaǵy Álı Oǵly Zulqaınaryn qumnyń ústinde oınap otyrǵan eken. Sol jerde jeńil avtokólik balany otyrǵan jerinde qaǵyp ketken deıdi. Qatty soqqydan 5 metrge deıin ushyp ketken búldirshin birden kóz jumǵan deıdi kórshileri.

“Tars etken dybys estildi. Men ıtti qaǵyp ketti me dedim. Túsinbeı qaldyq, shyqsaq, shań-tuman bolyp ketti. Júgirip barsaq, balany qaǵyp ketken eken. Balanyń basy jarylǵan, kıimi jyrtylǵan”, – dedi kýáger Margarıta Abdrahmanova. 

Turǵyndar dereý jedel járdem shaqyryp, balanyń ata-anasyna habar beripti. Biraq Álı Oǵly Zulqaınaryndy aman alyp qalý múmkin bolmaǵan. Aýyr soqqy alǵan búldirshin ákesiniń qolynda kóz jumǵan.

“Men jerde jatqan balany kórip, birden ata-anasyn aıǵaılap shaqyrdym. Bárimiz ne isterimizdi bilmeı qaldyq. Kólik joldyń ar jaq betinde tur eken. Júrgizýshisi uzaq ýaqyt shyqpady. Jedel járdem shaqyryp jatqanda, balanyń janyna kelip, balaǵat sózder aıtty. Artynsha kóliginiń mańyna baryp telefonmen sóılesti”, – dedi aýyl turǵyny Zarına Saǵaraeva. 

Aýyl turǵyndary búldirshindi qaqqan kólik ıesi osy aýyldyń turǵyny ári mektepte muǵalim bolyp jumys isteıdi deıdi. Al marqumnyń týystarynyń sózinshe, oqıǵa bolǵan kúni quzyrly organ qyzmetkerleri júrgizýshiniń jaǵdaıyna qatysty saraptama júrgizbegen, tergeýge de almaǵan.

“Qaqqan kólik júrgizýshisin qamamady, eshqandaı shara qoldanylmady. Tipti keshirim suraǵan joq. Keshe týystarymen kelip, óziniń kinásiz ekenin aıtyp, kerisinshe bizdi balaǵattap ketti. Men kináli áıel tıisti jazasyn alsa deımin. Búgin baýyrym óldi, endi erteń taǵy bireýdiń balasy óledi. Ádilettilik ornaýy tıis”, – dedi marqumnyń aǵasy Murat Ábıtov.

Okrýg ákimi de oqıǵadan habardar. Mundaı jaǵdaı birinshi ret boldy degen aýyl basshysy isti quzyrly organǵa tapsyrdyq deıdi.

“Qıyn jaǵdaı bolyp otyr. Bul máselemen búginde Eńbekshiqazaq aýdanynyń polısıasy aınalysyp jatyr”, – dedi Saımasaı aýyldyq okrýginiń ákimi Baqytjan Chýrmakov.

Almaty oblystyq polısıa departamenti qylmystyq kodekstiń 345-baby "kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzý" baby boıynsha is qozǵalǵanyn aıtady.

“Kólik júrgizýshisi ýaqytsha ustaý ızolátoryna qamaýǵa alyndy. Jol kólik oqıǵasy boıynsha qajetti saraptamalar taǵaıyndalýymen qylmystyq is tirkeldi”, – dep málimdedi Almaty oblysy polısıa departamentiniń resmı ókili Merýert Morákova.

Balasynan aıyrylǵan otbasy qylmyskerdiń tıisti jazasyn alǵanyn qalaıdy. Eger oblys deńgeıinde másele sheshilmese, Joǵarǵy sotqa shaǵymdanbaq.

Bul maqala týraly ne oılaısyz?