40 jyl tergeýshi bolyp jumys istegen Meıirhan Meıirmanqulov bul týraly Youtube-tegi "Tıek" baǵdarlamasynda aıtty. Onda ol atyshýly qylmystardy qalaı ashqanyn jáne saıası tulǵalarǵa qatysty tergeý jumystarynyń qalaı júrgizilgenin baıandaıdy.
Sonyń ishindegi eń eleýlisi — Dinmuhamed Qonaevqa qatysty qozǵalǵan is. Meıirhan Meıirmanqulovtyń aıtýynsha, Qonaevtyń ústinen aryz jazǵan óziniń shákirti eken.
"Shákirtiniń óziniń ustazdaryna qaraı shapqan kezderi boldy. Ózi tikeleı shappaıdy, aınalasyndaǵy adamdarǵa shaptyrtyp qoıady. Men sony baıqadym. Áıtpese, keıin Kalınınchenkonyń ózi maǵan úıime kelip turyp Qonaev týraly aıtty ǵoı, "men mynandaı taza istegen adamdy ómirimde kórgen emespin" dep. Perishte dep sodan shyqty ǵoı ol kisini. Barlyǵyna aıtatynym, men sol tergeýge Máskeýdiń atynan qatystym. Dinmuhamed Qonaev ómirinde kóp jaǵdaıda eki aılyq alyp otyrǵan. Bireýi akademıa atynan, bireýi ózi basshy bolyp turǵandaǵy aılyǵy. Akademıadan alǵan aılyǵyn balalar úıine aýdaryp otyrǵan. Ol kisiniń bir qasıeti — túbirtekterdiń barlyǵyn jınap, qattap otyrady eken. Sodan keıin bul kisi esh ýaqytta bireýdi jamandaǵan emes. Syrtynan qansha qaralap jatsa da, "ıt úredi, kerýen kóshedi" dep júre bergen. Biraq men ol kisiniń shákirti "úredi" dep oılaǵan joqpyn. Sol kezdiń ózinde men jaman áserde boldym", — dedi Meıirhan Meıirmanqulov.
