Қазақстан азаматтары ресми зейнеткерлік жасқа жетпей-ақ сақтандыру компаниялары арқылы өмір бойы зейнетақы төлемін алу мүмкіндігіне ие. Еңбек және халықты әлеуметтік қорғау министрлігі бұл жүйенің 2026 жылғы негізгі талаптары мен тәртібін түсіндірді, деп хабарлайды Alash.kz.
Министрлік таратқан ресми ақпаратқа сәйкес, зейнетақы аннуитеті шарттарын рәсімдеу жас ерекшелігіне және жинақ көлеміне байланысты белгіленеді. Стандартты зейнетақы аннуитетін рәсімдеу үшін ер азаматтардың жасы 55-тен, ал әйелдердікі 53-тен төмен болмауы шарт. Оған қоса, зиянды еңбек жағдайларында жұмыс істеп, кемінде 60 ай бойы міндетті кәсіптік зейнетақы жарнасы аударылған азаматтар бұл құқықты 50 жастан бастап пайдалана алады.
Сонымен қатар, елімізде кейінге қалдырылған аннуитет механизмі де жұмыс істейді. Бұл келісімшартты ерлер де, әйелдер де 45 жастан бастап бекітуге құқылы, ал тиісті кәсіптік жарналары бар азаматтар үшін бұл меже 40 жас болып белгіленген. Мұндай жағдайда қаражат төлеу келісімде алдын ала көрсетілген уақыттан бастап жүзеге асырылады.
Сақтандыру компаниясы арқылы төленетін қаражат көлемі тұрақты емес, ол жыл сайын кемінде 8 пайызға өсіп, инфляцияға сәйкес индекстеліп отырады. Бірақ бұл қызметті пайдаланудың басты шарты – Бірыңғай жинақтаушы зейнетақы қорында жеткілікті шекті қаражаттың болуы.
Ведомство өкілдері бұл жүйенің мемлекеттік базалық және ынтымақтасты зейнетақыны мерзімінен бұрын алуға рұқсат бермейтінін ескертеді. Зейнетақы аннуитеті тек жинақ қорындағы қаражаттың бір бөлігін сақтандыру ұйымына аудару арқылы ертерек төлем алуға мүмкіндік беретін қаржылық құрал болып табылады.
