Оңтүстік Кореяның Инчхон қаласында жергілікті жүргізушінің жолын бөгеп, оған қоқан-лоқы көрсеткен Қазақстан азаматы арада үш айға жуық уақыт өткен соң қолға түсті, деп хабарлайды Alash.kz.
Шырғалаңға толы оқиға биылғы жылдың 29 шілдесінде орын алған болатын. Кореялық бұқаралық ақпарат құралдарының мәліметіне сүйенсек, сол күні екі қазақстандық көлікпен жергілікті жүргізушінің соңынан түсіп, кейін жолын кесіп тоқтатқан. Көліктен шыққан ер адамдар жәбірленушіге дөрекілік көрсетіп, оның көлігін теуіп бүлдірген. Барлық заңсыз әрекеттер сол маңдағы көліктің видеотіркеуішіне толықтай түсіп қалған еді.
Бастапқы кезеңде жергілікті полиция күдіктілерді ізін суытпай таба алмаған. Алайда оқиға видеосы әлеуметтік желілерде кеңінен тарап кеткеннен кейін, тәртіп сақшылары тергеу жұмыстарын қайта жандандыруға мәжбүр болды. Құқық қорғау органдары бейнежазба арқылы көлік нөмірінің бір бөлігін қалпына келтіріп, қатысушылардың бірінің жеке басын анықтады. Нәтижесінде, 16 қазанда 21 жастағы қазақстандық азамат ұсталып, сот оның бой тасалап кету қаупіне байланысты қамауға алу түріндегі бұлтартпау шарасын санкциялады. Ал бұл оқиғаға қатысы бар екінші күдікті 25 жастағы Қазақстан азаматы бұған дейін миграциялық заңнаманы бұзғаны үшін Оңтүстік Корея аумағынан елден аласталғаны белгілі болды.
Ұсталған азамат полициядағы жауап алу кезінде оқиғаның мән-жайын түсіндіріп, сол күні көлік сатып алу жөніндегі мәміленің бұзылғанын айтты. Оның сөзінше, ол жәбірленушінің көлігін өзі келісімшарт жасаспақшы болған адамның көлігімен қате түсініп, шатастырып алған.
Орын алған жайтқа қатысты Қазақстанның Сыртқы істер министрлігі де ресми мәлімдеме жасап, азаматтың ұсталғанын растады. Ведомство дерегіне сәйкес, оған шабуыл жасаудан бөлек, өзге біреудің мүлкін қасақана бүлдірді, сондай-ақ көші-қон және автомобиль заңнамаларын бұзды деген ауыр айыптар тағылып отыр. Қазіргі уақытта қазақстандық дипломаттар ұсталған отандасымызға қажетті консулдық-құқықтық көмек көрсетуде.
