Қасым-Жомарт Тоқаев әлемдегі қарулы қақтығыстарға байланысты барлық елдерге үндеу жасады.
Президенттің айтуынша, соңғы жылдары халықаралық геосаяси жағдай күрделеніп, тұрақсыз сипат ала түскен. Әлемнің түрлі аймақтарында қақтығыстар мен соғыстар жалғасып, бұл жаһандық экономикаға да кері әсерін тигізіп отыр.
Мемлекет басшысы әсіресе Таяу Шығыстағы ахуалдың ушығып кеткеніне назар аударып, мұндай текетіресте ешбір ел түпкілікті пайдаға кенелмейтінін атап өтті. Оның сөзінше, Қазақстан да бұл үдерістерден сырт қала алмайды.
Тоқаев ең алдымен бейбіт тұрғындар мен азаматтық және экономикалық нысандарға бағытталған шабуылдарды тоқтатуға шақырды. Одан кейін тараптарды келіссөздерге келуге үндеді.
Сонымен қатар Президент Қазақстанның бұл жағдайда араағайын болуға ұмтылмайтынын, бірақ бейбіт келіссөздер өткізу үшін өз аумағын ұсынуға дайын екенін жеткізді. Оның пікірінше, мұндай кездесулерді Түркістанда ұйымдастыруға болады.
Мемлекет басшысы бұл бастама қақтығысқа тікелей қатысып отырған елдердің шешіміне байланысты екенін атап өтіп, өз ұсынысын қазақ халқының бейбіт ниетінің көрінісі ретінде бағалады.
Сөз соңында ол уақыт оздырмай қарулы әрекеттерді тоқтатып, келіссөздерді бастау қажет екенін айтты. Әйтпесе, тек әлемдік экономика ғана емес, халықтардың бейбіт өмірі мен жаһандық тұрақтылыққа да үлкен қауіп төнетінін ескертті.
