Каменское қаласында Нұрсұлтан Назарбаевқа қойылған барельефті бұзу туралы ұсынысқа Украина билігі жауап берді, деп жазады Alash.KZ
"Днепропетровск облысындағы Каменское қаласындағы оқу орнының ғимаратына орнатылған Нұрсұлтан Назарбаев барельефі коммунистік тоталитарлық режим мен ресейлік империялық саясат символикасына тыйым салатын заңнамаға қайшы келмейді". Мұндай қорытындыны Украинаның ұлттық жад институты берген.
Монументті бұзуды қазақстандық белсенді, «Демос» қоғамдық ұйымының жетекшісі Тұрарбек Құсайынов ұсынған. Ол Каменское қалалық кеңесіне жолдаған өтінішінде Назарбаевтың Коммунистік партияда және КСРО басқару органдарында жетекші қызметтер атқарғанын еске салған.
Каменское қалалық кеңесі Құсайыновтың өтінішін алған соң, Назарбаевтың тұлғасына баға беру үшін Украинаның ұлттық жад институтына жүгінген. 2026 жылғы 15 сәуірде Құсайынов қалалық кеңестен хат алған, оған институт басшысы Александр Алфёровтың жауабы тіркелген.
Алфёровтың айтуынша, институтта Нұрсұлтан Назарбаевтың ресейлік империялық саясатты жүзеге асыруға немесе насихаттауға қатысы туралы ақпарат жоқ. Украина заңнамасында мұндай саясат украин халқын бағындыру, қанау және ассимиляциялауға бағытталған шаралар жүйесі ретінде анықталады.
Сонымен қатар, Назарбаев Украина мемлекеттік наградаларының иегері: 2010 жылы «Еркіндік» орденімен және 1997 жылы І дәрежелі Ярослав Мудрый орденімен марапатталған. Барельеф оның оқу орнының түлегі әрі Қазақстан Республикасының президенті ретіндегі құрметіне орнатылған, онда тыйым салынған символика жоқ және қолданыстағы тіл туралы заң талаптарына сәйкес келеді.
каналы жазғандай: «Каменское жоғары кәсіптік училищесінің ғимаратына орнатылған Нұрсұлтан Назарбаевқа арналған барельеф қолданыстағы заңнамаға қайшы келмейді, сондай-ақ украин және қазақ халықтары арасындағы мәдени байланыстар мен достық қатынастарды бейнелейді», — деп қорытындылады институт басшысы.
Нұрсұлтан Назарбаев 1958–1960 жылдары Днепродзержинск қаласындағы №22 кәсіптік-техникалық училищеде оқыған. Қазіргі уақытта бұл қала Каменское деп аталады, ал оқу орны — Каменское жоғары кәсіптік училищесі. Назарбаевқа арналған барельеф осы оқу орнының ғимаратына 2005 жылы орнатылған.
