Қазақстанда оқушылардың білімін бағалау тәсілдері мен ҰБТ-ның жаңа форматы таныстырылды, деп хабарлайды Alash.kz.
Биылғы жылдың 15 қазанында Qazaq AI Research University базасында Жоғары білім беру қызметкерлері күніне арналған ауқымды форум өтті. Іс-шара барысында Ұлттық тестілеу орталығының (ҰТО) директоры Нұрсейіт Байжанов «ҰБТ-ның жаңа форматы оқушылардың білімін бағалаудың заманауи құралы ретінде» деген тақырыпта арнайы баяндама жасады. Алқалы жиынға Ғылым және жоғары білім министрлігінің өкілдері мен басшылығы, жоғары оқу орындарының басшылары мен ведомствоға қарасты ұйымдардың өкілдері қатысты.
Баяндамада Нұрсейіт Байжанов Ұлттық тестілеу орталығының ETS халықаралық ұйымымен бірлесе отырып жүзеге асырып жатқан Admission Insight Test (AIT) жобасы туралы егжей-тегжейлі баяндады. Бұл жоба 2026 жылдың ақпан айында бастау алған және оны іске асыру 2030 жылға дейін жоспарланып отыр. Жобаның басты мақсаты — білім беру жүйесіндегі соңғы өзгерістер мен заманауи талаптарды ескере отырып, жоғары оқу орындарына түсу тестілеуінің тәсілдерін түбегейлі қайта қарау.
Ұсынылған жаңа AIT құрылымы екі негізгі бөліктен тұрады:
Арнайы бекітілген бірінші бөлім 14 бейіндік пән бойынша пәндік тесттерден құралады. Ондағы тапсырмаларды ақпаратты жай ғана жатқа айтуға немесе қайталауға емес, материалды терең түсінуге басымдық бере отырып, мемлекеттік стандарттарға сай жаңарту көзделуде.
Екінші бөлім түлектердің дағдыларын бағалауға арналған. Ол сыни ойлауды, академиялық жазу мен зерттеу дағдыларын, коммуникацияны, жасанды интеллектті, сандық және цифрлық сауаттылықты, сондай-ақ креативті және дизайн-ойлауды бағалайтын бес түрлі модульді қамтиды. Қазіргі уақытта ең соңғы модуль әлі де әзірлеу сатысында тұр.
ҰТО директорының айтуынша, пәндік білім емтиханның негізгі діңгегі болып қала береді. Ал дағдыларды бағалау құралы пәндік білімді алмастырмайды, керісінше оны толықтырып тұрады. Тестілеудің бұл құрылымы білім беру саясаты мен ғылыми зерттеулердің нәтижелеріне сүйене отырып әлі де нақтыланатын болады.
Сонымен бірге баяндамада бұл жаңа жобаны әзірлеу процесінің ашықтығына ерекше назар аударылды. Мәселен, 2026 жылдың сәуір айында ҰТО мен ETS бірлесіп Астана қаласында 4 мыңға жуық респонденттің қатысуымен ауқымды зерттеу жүргізді. Сондай-ақ сегіз фокус-топ пен төрт тереңдетілген пікірталас ұйымдастырылды. Жаңа бағалау моделін қалыптастыру кезінде әртүрлі көзқарастарды ескеру үшін бұл жұмыстарға университеттер, оқытушылар және білім беру жүйесінің басқа да қатысушылары белсене тартылуда.
Жаңа AIT форматы бойынша пилоттық тестілеуді 2027 жылдың көктемінде өткізу жоспарланған.
