Өскемен қаласында туған күнін атап өту кезінде 12 жастағы қызының ернінен сүйген ер адам түскен бейнероликке байланысты полицейлер жүргізген тексеру жұмыстары аяқталды, деп хабарлайды Alash.kz.
Бұған дейін әлеуметтік желілерде мектеп оқушысының 12 жасқа толу кешінен түсірілген кадрлар тарап, қазақстандық қолданушылар арасында үлкен наразылық пен қызу талқы тудырған болатын. Бейнежазбада ер адам қызын туған күнімен құттықтап, бірнеше секунд бойы ернінен сүйгені көрінеді. Кейінірек қыздың ата-анасы қоғам сынына жауап беріп, видеодағы әкенің әрекетіне қатысты өз түсініктемелерін ұсынған еді.
Шығыс Қазақстан облысы Полиция департаменті баспасөз қызметінің мәліметінше, аталған дерек ресми түрде тіркеліп, құқық қорғау органдары тиісті зерделеу жүргізген. Қазіргі таңда жинақталған құжаттар одан әрі қарау үшін арнайы органға табысталды:
«Тексеру қорытындысы бойынша жиналған материалдар Өскемен қалалық кәмелетке толмағандардың істері және олардың құқықтарын қорғау жөніндегі комиссияның қарауына жіберілді», — деп мәлімдеді облыстық полиция департаментінің баспасөз қызметі.
Қоғамдық резонанс тудырған жағдайға Шығыс Қазақстан облысының әкімдігі де назар аударды. Жергілікті атқарушы билік өкілдерінің хабарлауынша, салалық мамандар оқиғаның барлық мән-жайын егжей-тегжейлі зерттеп, отбасына қажетті қолдау көрсеткен:
«Қыз бала сабаққа барып жүр. Оның мүдделері мен психологиялық жағдайы басты назарда», — деп атап өтті облыстық әкімдіктің баспасөз қызметі.