Америка Құрама Штаттарының Президенті Дональд Трамп Тегеранмен жасалатын алдағы шарт бұрынғы келісімдерге қарағанда тиімдірек болатынын мәлімдеді, деп жазады Alash.kz.
Ақ үй басшысының пайымдауынша, 2015 жылы қабылданған Бірлескен жан-жақты іс-қимыл жоспары (СВПД) АҚШ-тың ұлттық қауіпсіздігіне нұқсан келтірген сәтсіз құжаттардың бірі болған. Қазіргі әкімшілік бұрынғы қателіктерді ескере отырып, халықаралық талаптарға сай келетін жаңа құқықтық негіз дайындауға ниетті.
Тарихи деректерге сүйенсек, Иран мен «5+1» тобы (АҚШ, Ресей, Қытай, Ұлыбритания, Франция, Германия) арасындағы алғашқы ядролық келісімге Барак Обаманың тұсында қол қойылған болатын. Сол уақыттағы уағдаластық бойынша, Иран өзінің ядролық бағдарламасын шектеуге міндеттенді, ал халықаралық қауымдастық бұған жауап ретінде елге салынған экономикалық санкцияларды жоюға уәде берді. Алайда 2018 жылдың мамыр айында Дональд Трамп бұл келісімнен ресми түрде шығатынын мәлімдеген еді.
Келісімді қайта жандандыру мақсатында 2021 жылы Вена қаласында басталған келіссөздер процесі ешқандай нәтиже бермеді. Сонымен қатар өткен жылдың 18 қазанында СВПД-ның заңды күшін сақтап тұрған БҰҰ Қауіпсіздік Кеңесінің арнайы қарарының мерзімі де аяқталды. Бұл жағдай тараптар арасындағы құқықтық қатынастарды жаңадан қарастыруға негіз болды.
Қазіргі уақытта Вашингтон Иранның ядролық амбицияларын тізгіндейтін әрі АҚШ мүддесін толық қорғайтын құжат жобасын пысықтап жатыр. Трамптың пікірінше, жаңа келісім алдыңғы нұсқаларға қарағанда әлдеқайда қатаң әрі мазмұнды болады.
