Иран билігі Вашингтонға өзара қақтығысты тоқтату мен стратегиялық маңызы бар Ормуз бұғазын ашуды көздейтін жаңа бітімгершілік жоспарын ұсынды. Алайда АҚШ Президенті Дональд Трамп пен оның әкімшілігі бұл бастаманы қабылдаудан бас тартып отыр, деп жазады Alash.kz.
Вашингтон Тегеранның ұсынысындағы ең басты мәселе ядролық бағдарламаны талқылауды кейінге қалдыру туралы тармаққа түбегейлі қарсылық білдірді.
Иран Сыртқы істер министрі Аббас Арагчи Пәкістанға сапары барысында америкалық тарапқа арнайы ұсыныс жолдаған болатын. Бұл құжат ұзаққа созылған дипломатиялық тығырықты еңсеріп, келіссөздер үдерісін қайта бастауға бағытталған. Дегенмен, Ақ үй шенеуніктері мен ұлттық қауіпсіздік мамандары Иран басшылығының ниетіне күмәнмен қарайды. Әсіресе, ядролық қаруға қатысты келісімді белгісіз мерзімге шегеру әрекеті америкалық тараптың наразылығын тудырды.
Қазіргі уақытта екі ел арасындағы текетірес экономикалық және әскери қысым түрінде жалғасуда. Иран Ормуз бұғазы арқылы өтетін халықаралық кемелердің қозғалысын бұғаттаса, АҚШ Иранның мұнай порттарына теңіз блокадасын орнатты. Бұл шаралар Тегеранның мұнай экспортынан түсетін кірісін тоқтатуды көздейді. Вашингтонның басты талабы — Иранның жоғары байытылған уранды өткізуі және ядролық қару жасау амбициясынан толық бас тартуы.
Өз кезегінде Тегеран атом бомбасын жасау жоспарының жоқтығын алға тартып, тек уранды бейбіт мақсатта байыту құқығын талап етуде. Халықаралық басылымдардың хабарлауынша, Трамп әкімшілігі бұл ұсынысты «уақыт ұту әрекеті» деп бағалап, талаптардың қатаң орындалуын талап етіп отыр.
