Непалдағы су тасқыны кезінде үйінді астында қалған гидроэлектр станциясының жұмысшысы Санджай Сах тоғыз күннен астам уақыт бойы жарықсыз жерде өмір сүріп, аман қалған. Ол өзінің басынан өткен оқиғаны Reuters агенттігіне айтып берді, деп жазды Alash.kz.
Сахтың айтуынша, айнала қараңғы болғандықтан, көп уақыт бойы көзін жұмып отырған. Тамақ болмаған. Ол су тасқынынан кейін қалған суды және жартастардың арасынан сүзіліп шыққан суды ішкен. Қараңғыда үйінділерге соғылып, аяқтарын жарақаттаған.
Алғашында ер адам сыртқа шығудың жолын іздегенімен, кейін қауіпсіздеу жерде қалып, құтқарушыларды күтуге шешім қабылдаған. Оған әйелі мен екі жасар қызы туралы ой және дұғасы күш берген.
Сах уақытты мүлде ажырата алмай қалғанын айтты. Оның өзі екі-үш күн ғана өткен деп ойлағанымен, құтқарылған кезде үйінді астында он күнге жуық жатқанын білген.
Құтқарылуына шамамен 10–12 сағат қалғанда ол экскаваторлардың жұмыс істеген және баспалдақтардың сықырлаған дыбысын естіген. Бұл дыбыстар оған үміт берген.
Санджай Сах ауруханадан шығарылып, қазір Катмандуда әпкесінің үйінде оңалып жатыр.
