«Қазақмыс корпорациясы» ЖШС Басқарма төрағасы Руслан Өскенәлі Жезқазған өңіріндегі жұмыс сапары аясында кәсіпорынның цифрлық мүмкіндіктері мен ахуалдық орталықтың қызметін тексерді, деп жазады Alash.kz.
Басшылыққа кен өндіруден бастап дайын өнім шығаруға дейінгі барлық технологиялық тізбекті нақты уақыт режимінде бақылауға мүмкіндік беретін заманауи платформа таныстырылды. Бұл жүйе жұмыс барысын қашықтан қадағалап қана қоймай, өндірістік қауіпсіздік пен ресурстарды тиімді пайдалануды қамтамасыз етеді.
Сапар барысында шахталар мен өндірістік алаңдардағы қызметкерлер мен техниканың қозғалысын бақылайтын бейнемониторинг жүйесіне ерекше мән берілді. Диспетчерлік орталықтың жұмысымен танысқан Руслан Өскенәлі цифрлық бақылаудың жедел ақпарат алмасудағы маңызын жоғары бағалады. Орталықтандырылған жүйе бөлімшелер арасындағы байланысты нығайтып, төтенше жағдайлардың алдын алуға септігін тигізеді.
Компания басшысы өндірістік нысандарды аралау кезінде еңбек ұжымдарымен кездесіп, технологиялық жаңғырудың алдағы жоспарларын талқылады. Руслан Өскенәлі цифрлық шешімдерді дамыту мен бейнебақылау желісін жетілдіру — кәсіпорынның бәсекеге қабілеттілігін арттырудың басты шарты екенін атап өтті.
Сапар соңында инфрақұрылымды жаңарту және бақылау жүйелерін заман талабына сай бейімдеу бойынша нақты тапсырмалар берілді. «Қазақмыс» алдағы уақытта да өндірістік үдерістерді толық цифрландыру және мониторинг сапасын жақсарту бағытындағы жұмыстарды жүйелі түрде жалғастыра бермек.
