Әлемге әйгілі актер, каскадер және продюсер Джеки Чан түсетін "Құдайдың сауыты: Ультиматум" фильмнің режиссері бекітілді. Бұл картинаның түсірілімі Қазақстанда өтпек, деп хабарлайды Alash.kz.
Salem Entertainment медиа компаниясының Instagram парақшасында жарияланған ақпаратына сәйкес, әйгілі актер жобаның режиссерін өзі таңдаған.
Жаңа бөлімнің режиссері – Роберт Кун. Ол әлемдік киноиндустрияда танымал маман, Disney, Paramount, Universal, 20th Century Fox секілді алпауыт студиялардың экшн-сахналарын қоюмен айналысқан. Сондай-ақ ол "Особо опасен", "Он – дракон", "Президент Линкольн: Охотник на вампиров", "Майор Гром: Игра" сияқты фильмдердің түсірілімдеріне қатысқан.
"Түсірілім 2026 жылдың көктемінде басталады. Бұл – тек бастамасы ғана", – делінген компанияның хабарламасында.
Өз кезегінде Роберт Кун бұл жаңалыққа байланысты пікір білдірді.
"Әлі күнге дейін сене алар емеспін. Бұл – мен үшін зор құрмет әрі үлкен жауапкершілік! Бізге сәттілік тілеп қойыңыздар", – деп жазды ол.
