Бокстан 2000 жылғы Сидней Олимпиадасының чемпионы Ермахан Ибраимов бапкер Бақыт Сәрсекбаевпен болған әңгімесін баяндап, оның ұлттық құрамамен қайта жұмыс істеуі мүмкін екенін айтты, деп жазады Alash.kz.
"Бақыт Сәрсекбаев – қазіргі таңда өте мықты, тәжірибелі бапкер. Әрине, алғашында U-22 құрамасымен жұмыс бастағанда кейбір қиындықтар болған еді, содан кейін біраз үзіліс алды. Бірақ қазір сабырлы, ақылды күйде қайта оралды. Оған тағы мүмкіндік берілді. Шынын айтсам, оның оқу-жаттығу жиындарын ұйымдастыру тәсілі, спортшылармен жұмыс істеуі – бәрі жоғары деңгейде", – деді Ибраимов.
Олимпиада чемпионы әріптесіне ұлттық құрамаға қайта қосылу жөнінде кеңес бергенін де жасырмады.
"Мен оған: "Бақыт, сен міндетті түрде Қазақстан құрамасына қосылуың керек" дедім. Ол болса: "Қалай барамын, ол жақта бас бапкер бар ғой", – деді. Мен: "Саған бас бапкер болу шарт емес, аға жаттықтырушы ретінде бар. Егер еліміздің Олимпиада медальдарына үлес қосқың келсе, сол жолмен баруың керек", – деп кеңес бердім", – дейді Ермахан Ибраимов.
Айта кетейік, 2025 жылы Шри-Ланка астанасы Коломбода өткен жастар арасындағы Азия чемпионатында Бақыт Сәрсекбаевтың жетекшілігімен қазақстандық боксшылар 22 алтын медаль жеңіп алған болатын.
