Түркістан облысы, Ордабасы ауданында із-түзсіз кеткен 2010 жылғы жасөспірімді іздестіру шаралары сәтті аяқталды, деп хабарлайды Alash.kz.
Бірнеше күн бойы жүргізілген жедел-іздестіру жұмыстарының нәтижесінде ол Шымкент қаласының аумағынан аман-есен табылып, ата-анасына тапсырылды. Полиция департаментінің мәліметінше, жасөспірімнің денсаулығына ешқандай қауіп төніп тұрған жоқ.
Оқиғаның мән-жайына сәйкес, жасөспірім 21 наурыз күні үйінен Түркістан қаласына бару мақсатында шығып кеткен. Алайда ол межелеген жеріне жетпей, туыстарымен байланысын үзген. Іздестіру жұмыстары кезінде оның ұялы телефонын үйінде қалдырып кеткені анықталды. Бұл жағдай құқық қорғау органдарының жұмысын қиындатқанымен, оның жүрген бағытын бейнебақылау камералары арқылы қадағалау мүмкін болды.
Түркістан облысының полицейлері көршілес Шымкент қаласындағы әріптестерімен бірлесе отырып, ауқымды тексеру жұмыстарын жүргізді. Іздестіру шараларына қаланың қоғамдық орындары мен жасөспірімдер жиі баратын аймақтар қамтылды. Кешенді амалдардың арқасында баланың орналасқан жері анықталып, жедел түрде отбасына жеткізілді. Қазіргі таңда жасөспірімнің үйден кету себептері анықталуда.
