«Шет мемлекеттің адамдарына жер бермейміз». Бұл пікірді Түркістан облысының әкімі Дархан Сатыбалды түрік инвесторларымен өткен кездесуде айтты, деп хабарлайды Alash.kz ұлттық порталы.
"Шет мемлекеттің адамдарына жер бермейміз. Жер беруге болмайды",- деді Дархан Сатыбалды.
Белгілі болғандай, түрік инвесторлары Түркістан облысы, Шардары ауданында тамшылатып суару әдісін пайдалану арқылы жүгері егіп, өңірде зауыт салуға ниетті.
Өз кезегінде аймақ басшысы мемлекеттен жан-жақты қолдау болатынын айтып, инвесторларға зауыт ашуда қойылатын басты талаптарды түсіндіріп,жергілікті тұрғындарға жаңа кәсіптің қыр-сырын үйретуге шақырды.
"Сіз, мысалы үшін келесіз. Жергілікті тұрғындарға жүгері қалай өсірілетінін үйретесіз. Жер осы Қазақстан азаматынікі болуы керек. Осы мақсатта келісім-шартқа отырасыздар. Қытай мемлекетінен мақта-тоқыма кластер жасауға келген. Оларға да айтқанбыз. Бізде жерді тек Қазақстан азаматы ғана ала алады. Олар келісті. Онда мемлекеттің балансында болсын деді. Біз әлеуметтік-кәсіпкерлік корпорациясына бердік. ӘКК сіздермен келісім-шартқа отырады. Сіздер біздің жергілікті халыққа жүгері егудің жолдарын үйретесіздер, шыққан өнімді сіздерге береді" - деді өз сөзінде облыс әкімі.
