Каспийдегі қайғылы оқиғадан кейін ұсталған Қазақстан Әскери-теңіз күштері бас қолбасшысының бірінші орынбасары Данияр Хайрушевтің ата-анасы Президент Қасым-Жомарт Тоқаевқа үндеу жасап, істің барлық мән-жайы жан-жақты зерттеліп, тергеудің әділ әрі объективті жүргізілуін өтінді, деп хабарлайды Alash.kz.
Үндеуде Хайрушевтің ата-анасы Каспийдегі оқу-жаттығу кезінде қаза тапқан 14 әскери қызметшінің отбасылары мен жақындарына қайғыра көңіл айтты. Әкесі бұған дейін өздерінің де екі ұлынан айырылғанын ашып айтып, қаралы отбасылардың қайғысын терең түсінетіндерін білдірді.
«Ең алдымен, оқу-жаттығу кезінде қаза тапқан әскери қызметшілердің отбасылары мен жақындарына шын жүректен көңіл айтамыз. Біз олардың қайғысын терең түсінеміз, өйткені өзіміз де осындай қасіретті бастан өткеріп, екі ұлымыздан айырылғанбыз», — деді Данияр Хайрушевтің әкесі.
Сонымен қатар, ата-анасы ұлдарының мұндай сұмдық жағдайға қасақана жол беруі мүмкін еместігін алға тартып, оның мінезіне сипаттама берді.
«Бүгін ұлымыз Данияр туралы бірнеше ауыз сөз айтқымыз келеді. Ол адал, тәртіпті әрі жауапкершілігі жоғары азамат болып өсті. Ешқашан өзгелердің есебінен жеке пайда іздеген емес, біреудің дүниесіне көз тіккен жоқ. Ұлымыз мұндай жағдайға қасақана жол беруі мүмкін дегенге сенбейміз», — деді сарбаздың әкесі.
Сөз соңында марқұмның анасы Мемлекет басшысы Қасым-Жомарт Тоқаевқа тікелей жүгініп, әділ шешім шығарылуын өтінді.
«Құрметті Қасым-Жомарт Кемелұлы, біз Сізге ата-ана ретінде жүгініп, тек әділдік пен объективті тергеуді сұраймыз. Оқиғаның барлық мән-жайы толық анықталып, асығыс қорытынды жасалмайды деп үміттенеміз. Біз қаза тапқандардың отбасыларының қайғысына ортақпыз және оқиғаға қатысы бар барлық адамға қатысты әділ шешім болғанын қалаймыз. Қаза тапқан әскери қызметшілердің жаны жәннатта болсын», — деді Данияр Хайрушевтің анасы.
Еске сала кетейік, Данияр Хайрушев Каспий теңізіндегі оқу-жаттығу кезінде 14 әскери қызметшінің қаза болуына байланысты қозғалған қылмыстық іс аясында ұсталған болатын. Қазіргі уақытта аталған оқиға бойынша сотқа дейінгі тергеу амалдары жалғасуда.
