Жапонияның Аичи-Нагоя қаласында өтіп жатқан ХХ жазғы Азия ойындарында Қазақстан құрамасы академиялық ескек есуден кезекті алтын медальға қол жеткізді, деп хабарлайды Alash.kz.
Ерлер арасындағы рульсіз қос ескекті қайық сайысында бақ сынаған отандастарымыз Владислав Яковлев пен Иван Чернухин шешуші кезеңде жоғары шеберлік танытты. Қазақстандық жұп белгіленген қашықтықты 6 минут 25,13 секундта жүріп өтіп, мәре сызығын бірінші болып қиды. Жарыс жолында біздің спортшыларға ең басты қарсылас болған Қытай экипажы екінші орынды місе тұтып, отандастарымыздан 2,09 секундқа қалып қойды. Ал үздік үштікті Өзбекстан құрамасының өкілдері түйіндеді. Осы жүлденің арқасында ұлттық құраманың қоржынындағы алтын жүлделер саны сегізге жетті. Жалпы есепте Қазақстан қоржынында 8 алтын, 5 күміс және 8 қола медаль бар.
