Шымкентте 21 жастағы Нұрай Серікбайдың қазасына қатысты атышулы іс бойынша кезекті сот отырысы өтіп, оқиғаның жаңа мән-жайлары белгілі болды, деп хабарлайды Alash.kz.
Сот процесі кезінде куәгерлер мен марқұмның жақындары жантүршігерлік мәліметтерді бөлісті. Айыпталушы орындығында отырған Шерхан Аймаханға адам өлімі, аңдып соңынан түсу (сталкинг) және некеге тұруға мәжбүрлеу баптары бойынша айып тағылған. Прокурор қылмыстың егжей-тегжейі баяндалған айыптау актісін оқып берді. Соған қарамастан, сотталушы бұған дейінгі жауаптарында да, қазір де оқиғаның өз нұсқасын алға тартып, бірінші болып пышақ сұққан Нұрайдың өзі екенін айтып, жауабын өзгертуді жалғастырып жатыр.
Сайқалды қылмыстың куәгері Индира Беркінбаева қайғылы күнде көргендерін баяндап берді:
«Мен жұмыстан қайтып бара жатқанымда қыздың айқайлаған дауысын естіген едім. Сонда маған қарсы ұзындығы 15-20 сантиметрдей үлкен пышақ ұстаған белгісіз жігіт жүгіріп шықты, алайда оның денесінен ешқандай жарақат байқамадым. Ол менің жанымнан өтіп, жерде жатқан қызға қарай жүгірді де, оған тағы екі немесе үш рет пышақ сұқты. Бір сәтке мен сілейіп қатып қалдым. Қасымда тағы бір әйел тұрған еді. Ол да үрейден қатып қалды. Кейін ол маған да шабуыл жасай ма деп қорқып, үйге қарай қаштым».
Куәгердің бұл сөздерінен кейін марқұмның ата-анасы эмоцияларын ұстай алмай, қыздарының соңғы минуттарының анық-қанығын тыңдай отырып сот залында көз жастарына ерік берді.
Қарындасынан айырылған Сұлтан Серікбай да мәйітханадағы ауыр сәтті былайша еске алды:
«Оның денесінің сау жері қалмаған. Пышақ күтешесінің өзін тесіп өткен, ал ол су жаңа әрі өте қалың еді. Оның мойны туралы мүлдем айтқым да келмейді. Беті мүлдем танылмайтындай бұзылған. Оған тоқтаусыз соққы жасаған. Бірден тану мүмкін болмады. Нұрайды көргенде көз жасымды тоқтата алмадым».
Сонымен қатар марқұмның бауырлары сотта трагедияға дейін орын алған оқиғаларды жайып салды. Олардың сөзінше, Шерхан Аймахан ұзақ уақыт бойы Нұрайдың соңынан қалмай, үнемі аңдып жүрген. Қайғылы жағдайға дейін жақындары құқық қорғау органдарына көмек сұрап жүгінгенімен, ешқандай пәрменді шара қабылданбағанын жеткізді. Марқұмның екінші ағасы Дінмұхамед Серікбай заң орындарының әрекетсіздігін ашына айтты:
«Ол біздің үйдің жанында бірнеше күн бойы аңдыды. Біз бәрін хабарладық, бірақ оператор тіпті біздің өтінішімізді тіркеген де жоқ. Полицияда арызды іс жүзінде қабылдамады, ал прокуратура іс қозғаудан бас тартты. Сенім телефонына соққан қоңырауларымыз да жауапсыз қалды».
Еске сала кетейік, қайғылы оқиға 11 қаңтарда Шымкент қаласында болған еді. Бұған дейін Нұрай Серікбайдың әкесі де қызымен соңғы сөйлесуі туралы айтып берген болатын. Атышулы іс бойынша сот процесі одан әрі жалғасуда.
