Дания, Нидерланд және Норвегия Украинаға қару жеткізу үшін АҚШ-пен келісім жасасты, деп хабарлайды Alash.kz.
Келісімге сәйкес, Пентагон Киевке әуе-жер санатына жататын ERAM зымырандарын жеткізбек. Бұл қару құрлықтағы нысандарды алыстан жоюға арналған. Сондай-ақ Украинаға GPS пен INS навигациялық жүйелері және сигнал қорғайтын арнайы модульдер жіберіледі.
АҚШ Мемлекеттік департаменті келісімді ресми түрде мақұлдады. Оның жалпы құны – 825 млн доллар. Қаржыны толықтай Дания, Нидерланд және Норвегия төлейді.
Мәліметке сүйенсек, Украинаға 3 мыңнан астам ERAM зымыраны берілмек. Олар 250 шақырымға дейін ұшады, алайда 460 шақырым қашықтыққа жететін түрлері де қолданысқа берілуі мүмкін.
Бұған дейін Киев 850 млн долларға 3350 зымыран алуды сұраған еді. Сарапшылардың айтуынша, жаңа келісім аясында Украина 825 млн долларға шамамен 3 мыңнан астам зымыранға қол жеткізеді.
