Ресейдегі Удмуртия тұрғыны сары майдың қымбаттауына байланысты жарық көрген VК жазбасының астына пікір жазып, пікіріне бола кейін тергеуге алынды, деп хабарлайды Alash.kz ұлттық порталы.
Удмуртия соты 38 жастағы Мога қаласының тұрғынын терроризмге шақырды деп айыптап, соңыра қамауға алды. Себебі тұрғын VK-дегі сары май бағасының көтерілгеніне қатысты жазбаға пікір қалдырған.
Бұл туралы удмурт соттарының баспасөз қызметі хабарлады.
"Айыпталушы Ресей Федерациясының Ауыл шаруашылығы министріне қарсы зорлық-зомбылық әрекеттерге шақыратын жағымсыз ақпарат жариялады", - деп нақтылады баспасөз қызметі.
Нақтылай кетейік, "Медиазона" агенттігінің хабарлауынша, Ресей Ауыл шаруашылығы министрлігінің басшысы Оксана Лут елдегі майдың қымбаттағанын айтып, мұны ресейліктер табысының өсуімен байланыстырған. Бұл туралы ақпарат аталмыш әлеуметтік желіде жарық көрген.
Бұл жазбаның астында желі қолданушысы Евгения Рогозина пікір жазып, "жалмауыз кемпірді өртеп жіберіңіз!" - деген.
"Зорлық-зомбылыққа шақыратын пікір" иесі бірден айыпталды, түрмеге жіберілді. "Медизаона" Рогозинаның 1987 жылы туылғанын анықтады. Бұл айыпталушы хақында сот жариялаған ақпаратқа сәйкес келеді.
