Бішкекте электросамокат қағып кеткен әйел алған жарақаттарынан ауруханада қайтыс болды. Қайғылы оқиға 6 қазанда Шыңғыс Айтматов даңғылында, «Манас» кинотеатры маңында болған. Бұл туралы 24.kg басылымына Facebook қолданушысы Жумгалбек Омурканов хабарлаған, деп жазды Alash.kz.
Оның айтуынша, әйел қызымен бірге көшеде келе жатқанда, электросамокат мінген ер адам оны жоғары жылдамдықпен қағып кеткен. Салдарынан әйел құлап, аяғын сындырып алған. Оқиға орнына жедел жәрдем шақырылып, зардап шегуші ауруханаға жеткізілген.
Әйелге бірнеше күннен кейін ота жасалған. Дәрігерлер алдымен ісіктің қайтуын күткен. Алайда әйел есін жимаған күйі 16 қазанда көз жұмған. Жақындарының айтуынша, оны жерлеу рәсімі сол күні өткен.
Жумгалбек Омурканов оқиғадан кейін жаяу жүргіншілерге арналған тротуарларда да қауіпсіз жүру қиындағанын айтып, Бішкек қаласының мэриясын электросамокаттардың қозғалысына қатысты шара қабылдауға шақырды.
Алайда материал жарияланған сәтте Бішкек қалалық жол-патрульдік милиция басқармасы мен аурухана оқиға туралы ресми ақпарат бермеген. Сондықтан оқиғаның мән-жайы мен әйелдің өліміне қатысты мәліметтер әзірге тәуелсіз ресми растауды қажет етеді.
