Черногорияның Будва қаласында World Boxing ұйымының U19 санатындағы әлем чемпионатының финалдық жекпе-жектері өтуде, деп хабарлайды Alash.kz.
Турнирдің аса ауыр салмақтағы шешуші кезеңінде өнер көрсеткен қазақстандық спортшы Зарина Толыбай Ресей өкілі Самира Итониевамен айқас өткізіп, 4:1 есебімен сенімді жеңіске жетті.
Заринаның бұл финалға дейінгі жүріп өткен жолы да сәтті болды. Мәселен, ол 1/4 финалда тувалулық Френцис Таафакиді 2-раундта техникалық нокаутпен жеңсе, 1/2 финалда түркиялық Мирей Догруды 5:0 есебімен тізе бүктірді.
Бокс федерациясының мәліметіне сәйкес, талантты отандасымыз осы жылдың шілде айында ғана Индонезияның Джакарта қаласында өткен U19 Азия чемпионатында да топ жарған болатын.
