Шанхайда өткен халықаралық математикалық олимпиадада (IMO) Қазақстанның намысын қорғаған оқушылар ел қоржынына 3 күміс және 3 қола жүлде салды, деп хабарлайды Alash.kz.
Қытай жерінде ұйымдастырылған биылғы білім бәсекесіне 117 мемлекеттен келген 700-ге жуық дарынды мектеп оқушысы бақ сынады. Аталған зияткерлік сайыс ғаламдағы ең тарихы терең әрі беделді жарыстардың бірі саналады.
Оқу-ағарту министрлігі таратқан ақпаратқа сәйкес, күміс медальді Алматыдағы Haileybury Almaty халықаралық мектебінің 12-сынып оқушысы Тимур Мұрат, осы қаладағы NURORDA мектеп-лицейінің 11-сынып оқушысы Әли Еркебұланұлы және Республикалық физика-математика мектебінің 10-сынып оқушысы Батырхан Бейғанов еншіледі.
Үздік үштіктен көрінген тағы үш отандық өрен қола жүлдені қанжығасына байлады. Олар – Алматыдағы NURORDA мектеп-лицейінің 11-сыныбында оқитын Ерасыл Алтынбек, Астана қаласындағы Spectrum халықаралық мектебінің 12-сынып оқушысы Марғұлан Шарел және Haileybury Almaty халықаралық мектебінің 12-сынып түлегі Әмірлан Аманжолов.
Әлемдік математикалық олимпиаданың негізі 1959 жылы қаланған. Қазақстан құрамасы бұл беделді турнирге 1992 жылдан бері үзбей қатысып келеді.
Осы кезең аралығында отандық мектеп оқушылары аталған додада 34 мәрте бақ сынап, жалпы жиыны 16 алтын, 54 күміс, 86 қола медальмен қатар, 30 Құрмет грамотасын иеленген.
