Әлем кубогының финалдық бәсекесінде шаршы алаңға шыққан қазақстандық былғары қолғап шеберлері Назым Қызайбай мен Виктория Графеева қарсыластарын қапы қалдырып, беделді доданың жеңімпазы атанды, деп хабарлайды Alash.kz.
3 дүркін әлем чемпионы, бұл жолы 54 келі салмақ дәрежесінде бақ сынаған Назым Қызайбай шешуші жекпе-жекте әлем біріншілігінің екі мәрте жүлдегері, италиялық Сирине Чараабимен күш сынасты. Кездесу барысында отандасымыз барлық 3 раундта да айқын басымдық танытып, қорытынды есепте 4:1 нәтижесімен жеңісті жұлып алды. Осыған дейін Назым 2025 жылы Астана төрінде ұйымдастырылған Әлем кубогында 48 келіде бас жүлдені иеленген болатын. Оның бұл жолғы алтынға бастар сапары да оңай болған жоқ: 1/8 финалда Париж Олимпиадасының қола жүлдегері, оңтүстіккореялық Им Э Джиді (4:1), ширек финалда польшалық Виктория Рогалинсканы (5:0), ал жартылай финалда таиландтық Натнича Чонгпронгклангты (3:2) тізе бүктірді.
Сондай-ақ, 60 келі салмақта өнер көрсеткен әлем чемпионатының жүлдегері Виктория Графеева да шаршы алаңда нағыз сенсация жасады. Ол финалдық айқаста Париж Олимпиадасының чемпионы, тайпейлік Лин Юй-Тинмен қолғап түйістірді. Алғашқы раундта төрешілер басымдықты қарсыласқа бергенімен, Виктория соңғы секундтарға дейін жанқиярлықпен шабуылдап, тартысты бәсекені 3:2 есебімен өз пайдасына шешті. Графеева финалға дейінгі кезеңдерде 1/4 финалда оңтүстіккореялық Иеонжи Охты (5:0) айқын ұтса, жартылай финалда әлем чемпионатының тағы бір жүлдегері, өзбекстандық Ситора Турдибековадан (4:1) басым түскен еді.
