Желіде университет оқытушысына қатысты видео тарады. Әл-Фараби атындағы Қазақ ұлттық университеті бейнежазбаның 7 қазанда түсірілгенін растады. Оқу орнының мәліметінше, педагогпен еңбек шартын тоқтату туралы бұйрық 2 қазанда тәртіптік комиссияның шешімі негізінде шығарылған. Оқытушы комиссия отырысына шақырылғанымен, жиынға келмеген. Бұл туралы Alash.KZ хабарлады.
Университет әкімшілігі маманның қызметінен босатылуына 2024–2026 жылдар аралығында тіркелген бірнеше заңбұзушылық себеп болғанын мәлімдеді.
Оқиға кезінде оқытушы аудиторияға рұқсатсыз кіріп, сол жерде сабақ өткізіп отырған басқа педагогтен бөлмеден шығуын талап еткен. Кадр қызметінің өкілі туындаған мәселені дәлізде талқылауды ұсынған. Алайда оқытушы әңгімені студенттердің көзінше жалғастыруды жөн көрген.
Университет өкілдері мұндай жағдайларда студенттерді оқытушылар арасындағы жеке келіспеушіліктер мен еңбек дауларына араластырмау қажеттігін атап өтті. Оқу орнының пікірінше, мұндай мәселелер білім алушылардың қатысуынсыз, тиісті тәртіп аясында шешілуі керек.
