Қазақстанда ерікті зейнетақы жарналары есебінен зейнетақы төлемдері автоматты түрде тағайындалады, деп жазады Alash.kz.
Бұл туралы «Бірыңғай жинақтаушы зейнетақы қоры» акционерлік қоғамы хабарлады.
«2026 жылғы наурыздан бастап БЖЗҚ-да ерікті зейнетақы жарналары (ЕЗЖ) есебінен төлемдерді өтінішсіз (проактивті) тәртіппен іске асыру енгізілді. Бұл нені білдіреді? Егер ЕЗЖ есебінен жинақтарыңыз болса, зейнеткерлік жасқа жеткен кезде төлемдер БЖЗҚ-ға жеке өтініш бермей-ақ автоматты түрде тағайындалады», – делінген ресми хабарламада.
Бұл келесі жағдайларда іске асады:
— мемлекеттік бюджеттен төленетін зейнетақыны рәсімдеу кезінде;
— міндетті зейнетақы жарналары (МЗЖ) және (немесе) міндетті кәсіптік зейнетақы жарналары (МКЗЖ) есебінен төлемдерді рәсімдеу кезінде
Төлем тәртібі:
• егер жинақ сомасы ең төменгі зейнетақының 12 еселенген мөлшерінен аспаса, біржолғы төлем ретінде төленеді (2026 жылы – 828 588 теңге)
• ал егер одан көп болса, міндетті жарналар есебінен жасалатын төлемдермен бірге таусылғанға дейін ай сайын төленеді.
Қажет болған жағдайда, алушы төлем тәртібін өзгерту үшін БЖЗҚ-ға жүгінуге құқылы.
БЖЗҚ мәліметінше, проактивті тәртіп зейнеткерлік жасқа жеткен, бірақ бұған дейін ЕЗЖ есебінен төлемдерге жүгінбеген тұлғаларға қолданылады, соның ішінде 50 жасқа толған немесе мүгедектігі бар тұлғалар.
Бұл ретте:
50 жасқа толған немесе мүгедектігі бар азаматтар ЕЗЖ есебінен төлемдерді өз бетінше рәсімдей алады:
— enpf.kz сайтындағы жеке кабинет арқылы
— мобильді қосымшада
— Қор бөлімшелерінде
Жаңашылдық төлем алу үдерісін жеңілдетуге және жинақтардың пайдаланылмай қалу тәуекелін азайтуға бағытталған.
Толық ақпаратты enpf.kz сайтынан алуға болады.
