Қазақстан Республикасы Ішкі істер министрлігі Әкімшілік полиция комитетінің ресми өкілі Ақтоты Боранова ел ішінде жиі тіркелетін, бірақ тұрғындар жауапкершілігін біле бермейтін құқық бұзушылықтар туралы мәлімет берді, деп жазады Alash.kz.
Ортақ пайдалану орындарын ластау, шу деңгейін сақтамау және арнайы қызметтерді негізсіз шақыру сияқты әрекеттер үшін қомақты ақшалай жаза қарастырылған. Полиция өкілінің айтуынша, бұл ережелердің көбі өзге азаматтардың жайлылығы мен қала тазалығын сақтауға бағытталған.
Қоғамдық тәртіпті бұзатын ең ауыр заң бұзушылықтардың бірі ретінде полицияға немесе жедел жәрдемге жалған қоңырау шалу белгіленген. Мұндай негізсіз әрекет үшін азаматтарға 60 айлық есептік көрсеткіш көлемінде, яғни 259 500 теңге айыппұл салынады. Сонымен қатар, абаттандыру ережелеріне сәйкес, көпқабатты үйлердің кіреберісінде велосипед немесе арба сақтау, аулада көлік жуу және үй маңына қоқыс үйінділерін жинау үшін де ескерту жасалып, 20 АЕК-ке дейінгі мөлшерде әкімшілік шара қолданылуы мүмкін.
Тұрғындар арасындағы түсініспеушіліктерге көбіне үй жануарларын серуендету ережелері мен түнгі уақыттағы шу деңгейі себеп болады. Ит иелері үй жануарының артынан тазалық сақтамағаны үшін 10 АЕК көлемінде шығынға батса, тыныштықты бұзғандар үшін бірінші ретте 5 АЕК, ал қайталанған жағдайда 10 АЕК айыппұл қарастырылған. Жұмыс күндері сағат 22:00-ден кейін, ал демалыстарда 23:00-ден кейін шулауға заңмен тыйым салынған.
Автокөлік жүргізушілері мен жолаушыларының көшеге немесе көліктен қоқыс тастауы, сондай-ақ қоғамдық орындарда түкіру сияқты әрекеттері де назардан тыс қалмайды. Көліктен қоқыс лақтырғаны үшін 3 АЕК айыппұл салынса, ортақ орындарды ластағаны үшін жаза 10 АЕК-ке дейін барады немесе 40 сағаттық қоғамдық жұмысқа алмастырылады. Елорда секілді ірі қалаларда мұндай олқылықтарды анықтау үшін дрондар мен автоматтандырылған бейнебақылау жүйелері белсенді қолданылуда.
Қазіргі таңда құқық бұзушылықтардың басым бөлігі азаматтардың белсенділігі мен бейнебақылау камераларының көмегімен анықталуда. Азаматтар көбіне көршілердің шуына, ауладағы заңсыз тұраққа және тазалықтың сақталмауына шағымданады. Полиция мамандары кез келген тұрмыстық ұсақ-түйектің соңы заң алдындағы жауапкершілікке әкелетінін, сондықтан қоғамдық ортада белгіленген ережелерді қатаң сақтау қажеттігін ескертеді.
