Қазақстанда Ресейден келетін импортқа салынған тыйым ет бағасының өсуіне әкелуі мүмкін, деп хабарлайды Alash.kz.
Қазақстанның бірқатар аймақтарында ет өнімдерінің құны айтарлықтай қымбаттауы ықтимал. Отандық өндірушілер Ресейдің бірнеше өңірінен тірі мал мен ет өнімдерін тасымалдауға қойылған шектеулер ішкі нарықтағы баға саясатына кері әсерін тигізеді деп қауіптенеді.
Ақпан айында еліміздің құзырлы органдары Ресейдің Алтай өлкесінен, Солтүстік Кавказ округіне қарасты республикалардан, сондай-ақ Қалмақстан, Бурятия, Астрахань және Новосибирск облыстарынан өнім әкелуге тыйым салды. Ауыл шаруашылығы министрлігінің Ветеринариялық бақылау және қадағалау комитеті бұл қадамды көрші елде пастереллез ауруының өршуімен байланыстырды. Ведомство мамандары шектеу шаралары эпидемиологиялық жағдай тұрақталып, өнім қауіпсіздігі толық расталғаннан кейін ғана алынатынын алға тартты.
Алайда бұл шешім кәсіпкерлер арасында түсініспеушілік тудырып отыр. Ет комбинатының директоры Азамат Шалмағамбетов шекараның жабылуы нарықтағы бағаның негізсіз өсуіне түрткі болатынын айтады. Оның пікірінше, пастереллез ауруына байланысты ет импортына толық тыйым салудың логикалық негізі әлсіз.
Ет өңдеу саласының өкілі жануардың денесіндегі қоздырғыштардың өңделген және тоңазытылған өнім арқылы таралу мүмкіндігі төмен екенін атап өтті.
Азамат Шалмағамбетов: «Егер жаңа сойылған етті қаптап, тоңазытқышы бар жүк көлігіне тиеп, пломбаласа, ол ет ауру қоздырғышымен қалай байланысады? Мүлде байланыспайды. Ауруға шалдығу үшін жануар тірі болуы керек. Егер қауіптенсеңіздер, жүк көлігінің дөңгелектерін шекарада өңдеңіздер», - деп, балама қауіпсіздік шараларын қолдануды ұсынды.
Қазіргі таңда нарық қатысушылары бұл шектеулердің ұзаққа созылуы отандық тұтынушылардың қалтасына ауыр салмақ салады деп есептейді. Жағдайдың одан әрі қалай өрбитіні шекарадағы ветеринариялық бақылаудың қорытындыларына байланысты болмақ.
