«Қазақмыс корпорациясы» ЖШС өндірістік жарақаттануды толығымен жою мақсатында «тоқтату жиналысы» (Safety Stand Down) атты жаңа өзара іс-қимыл циклін іске қосты, деп жазады Alash.kz.
Ашық диалог түріндегі алғашқы кездесулер Нұрқазған кенішінде, Балқаш мыс балқыту зауытында, «Балқаш Тау-Кен Өндірісі» кәсіпорындарында және «Қазақмыс Барлау» бөлімшелерінде ұйымдастырылды.
Бұл бастаманың негізгі мақсаты — жұмыс үдерісі кезінде саналы түрде қысқа үзіліс жасап, қызметкерлердің назарын ең басты құндылық — өмір мен денсаулықты қорғауға аудару. Тәжірибе көрсеткендей, ауыр жазатайым оқиғалар көбіне нұсқаулықтың жоқтығынан емес, асығыстық пен қауіпті сәтте үнсіз қалудан болады. Мұндай жиналыстар «әрекетсіздік тізбегін» үзіп, ұсақ қателіктердің үлкен қасіретке айналуының алдын алуға мүмкіндік береді.
Корпорация басшылығы кез келген қауіпті жұмысты тоқтату — әрбір жұмыскердің тек құқығы ғана емес, сонымен бірге басты міндеті екенін ресми түрде мәлімдеді. Жұмысты қауіпсіздік мақсатында тоқтатқан қызметкерлерге ешқандай жаза қолданылмайды, керісінше, мұндай қадам кәсіби жауапкершілік ретінде бағаланады.
«Қазақмыс корпорациясы» ЖШС Басқарма төрағасы Руслан Өскенәлі бұл ұстанымның маңыздылығын былай деп атап өтті:
«Өмір мен денсаулыққа қауіп төнген жағдайда жұмыс істеуге жол берілмейді. Өндірістік жоспар тек қауіпсіздік талабы қатаң сақталған кезде ғана жүзеге асырылуы тиіс».
Айта кету керек, «тоқтату жиналысы» компанияның 2026-2028 жылдарға арналған өнеркәсіптік қауіпсіздікті трансформациялау стратегиясының ажырамас бөлігі болып табылады. 2026 жыл Қауіпсіздік жылы деп жарияланып, басқару жүйесі оқиғаның салдарын жоюдан оның алдын алуға бағытталды. Алдағы уақытта бұл формат корпорацияның барлық өндірістік алаңдарына тұрақты түрде енгізілетін болады.
