Қайғылы жағдай: Арыстағы әскери бөлімде үш адам қаза тапты

Арыстағы әскери бөлімде үш адам қаза болды, деп хабарлайды Alash.kz ұлттық порталы. Айқын газетіне сілтеме жасап. 

Бүгін, 2024 жылғы 5 шілдеде, Арыс қаласындағы әскери бөлім аумағында кәріз жүйесіне қызмет көрсету мен тазалау жұмыстарын жүргізу кезінде кәріз газымен улану салдарынан үш адам қаза тапты, - деп хабарлайды Қорғаныс министрлігі

Оның ішінде екі азаматтық тұлға және бір келісімшарт бойынша әскери қызметші бар.

Оқиға жұмыс барысында абайсызда құдыққа құлап кеткен Шымкент аудандық пайдалану бөлімінің жұмысшысын құтқару кезінде орын алды. Оған көмекке келген тағы екі жұмысшы мен келісімшарт бойынша екі әскери қызметші де жағдайдың нашарлауына байланысты жоғары жаққа көтеріліп шыға алмады. Нәтижесінде үш адам сол жерде қаза тапты. Тағы бір жұмысшы мен әскери қызетші Арыс қаласының ауруханасына жеткізілді. Қазіргі таңда олардың жағдайы тұрақты-ауыр деп бағаланып отыр.

Қорғаныс министрлігінің басшылығы мен Қарулы күштердің жеке құрамы қаза тапқандардың туыстары мен жақындарына қайғыларына ортақтасып көңіл айтады.

Олардың отбасыларына барлық қажетті көмек көрсетілетін болады.