Түркия Президенті Режеп Тайып Ердоған әуе кеңістігіндегі зымыранға қатысты оқиғадан кейін Иран тарапына ресми ескерту жасады, деп жазады Alash.kz.
Мемлекет басшысы аймақтағы тұрақсыздық кезінде ел қауіпсіздігін қорғау тетіктері күшейтілгенін атап өтті. Режеп Тайып Ердоған Түркияның шекара бүтіндігі мен әуе кеңістігінің қауіпсіздігі басты назарда екенін жеткізді.
Ол өз сөзінде: «Аймағымыз бастан кешіріп жатқан осынау қиын күндерде біз шекарамыз бен әуе кеңістігіміздің қауіпсіздігіне бейжай қарамаймыз. Бүгінгі оқиғадағыдай, біз НАТО-дағы одақтастарымызбен тығыз байланыстамыз, барлық қажетті шараларды қабылдап, тиісті араласу жұмыстарын дереу жүргіземіз. Сондай-ақ, мұндай оқиғалардың қайталануын болдырмау үшін ескертулерімізді барынша ашық түрде жеткіземіз», – деп мәлімдеді.
Қазіргі уақытта түрік тарапы халықаралық одақтастарымен бірлесе отырып, аймақтық қауіп-қатерлердің алдын алу шараларын қатаңдатып жатыр. Ресми Анкара мұндай оқиғалардың алдағы уақытта қайталанбауы үшін дипломатиялық және әскери дайындықтың жоғары деңгейде екенін көрсетті.
