Куба президенті Мигель Диас-Канель АҚШ президенті Дональд Трампқа жауап беріп, ел тәуелсіздігін қасық қаны қалғанша қорғауға дайын екенін мәлімдеді, деп жазады Alash.kz ұлттық порталы.
“Куба — еркін, тәуелсіз және егемен ел. Ешкім бізге не істеу керегін айтуға құқығы жоқ. Куба шабуыл жасамайды, АҚШ бізге 66 жыл бойы шабуыл жасап келеді. Куба қорқытып жатқан жоқ, ол өзін қасық қаны қалғанша қорғауға дайын.
Бүгін елімізге қатыгездікпен шабуыл жасап жатқандар халқымыздың өз саяси моделі пайдасына жасаған ерікті таңдауына ашулы. Біз бастан кешіріп жатқан экономикалық қиындықтар үшін революцияны кінәлайтындар ұялуы керек, өйткені олар мұның АҚШ-тың бізге 60 жыл бойы көрсетіп келе жатқан және қазір күшейе түсу қаупі бар қатыгез қысымының салдары екенін біледі және мойындап отыр, —деп жазды Диас-Канель X әлеуметтік желісінде.
Еске сала кетейік, бұған дейін Дональд Трамп Кубаны тым кеш болмай тұрып АҚШ-пен келісімге келуге шақырғанын жазған болатынбыз.
