Ресейдің Бурятия республикасындағы «Ирокинда» кенішінде болған табиғи апат салдарынан бірнеше кенші қаза тапты. Мерт болған алты адамның бірі Қазақстан Республикасының азаматы екені ресми түрде расталды, деп жазады Alash.kz.
Төтенше жағдай жұмысшылар технологиялық бағыттағы жол тазарту жұмыстарын жүргізіп жатқан сәтте орын алған. Қазіргі таңда оқиғаның мән-жайы зерттеліп, зардап шеккендерге қатысты тиісті шаралар ұйымдастырылуда.
Қайғылы оқиға 28 сәуір күні таңертең өндірістік аймақта болған. ТАСС агенттігі таратқан мәліметке сәйкес, қар көшкіні жүрген мезетте нысанда тоғыз адамнан тұратын жұмыс тобы болған. Қалың қар массасы жұмысшыларды басып қалған. Топ құрамындағы үш адам үйінді астынан өз күштерімен шығып, аман қалды. Алайда қалған алты жұмысшыны құтқару мүмкін болмады.
Оқиға орнына шұғыл жеткен құтқару қызметінің мамандары жүргізген іздестіру жұмыстарының нәтижесінде алты адамның денесі табылды. Алдын ала мәліметтер бойынша, қаза тапқандардың бесеуі Ресей Федерациясының тұрғындары болса, біреуі Қазақстаннан барған жұмысшы. Құтқарушылар мен арнайы техника таулы аймақтағы тазарту жұмыстарын аяқтап, қаза болғандарды тасымалдау ісін қолға алды.
