Атырау облысында қоғамды дүр сілкіндірген сұмдық оқиғаның ақ-қарасы анықталар тұста күтпеген жағдай орын алды, деп хабарлайды Alash.kz.
Кенже ұлынан көрген қорлығы мен ұрып-соққанын айтып, елді шулатқан 90 жастағы Әділхан Сисеновтің сот процесі жақындаған кезде денсаулығы күрт сыр беріп, жады нашарлап кетті. Есте сақтау қабілетінен айырылған қарт бүгінде болған оқиғалардың ешқайсысын есіне түсіре алмайтын халге жеткен. Марқұм ақсақалдың туыстары бұл жағдайға сотқа дейін айлар бойы созылып кеткен тергеу жұмыстары мен жүйкеге түскен ауыр салмақ себеп болғанын айтып, қатты қапалы.
Еске сала кетсек, осы жылдың жаз айында Әділхан ақсақал Атырауға келіп, өз шаңырағында ұлынан көрген зорлық-зомбылығын ашық айтқан болатын. Сол уақытта оны өз үйінде ұрып-соғып, ас-сусыз қамап қойғаны белгілі болды. Түн ішінде терезеден қашып шығып, туысының үйіне тығылған қарияның денесіндегі көгерген жарақаттар мен айтқан сөздері әлі күнге дейін ел есінде. Қазіргі таңда қарт Қызылқоға ауданы Сағыз ауылындағы ұлының үйінде жатыр. Жағдайының ауырлығын жеткізген қарындасы Кенжетай Сисенова ақсақалдың басынан өткен ауыр күндерін былайша еске алды:
«Мен сонда алып кетпесем, үйіне байлап қоя ма? Бұл кісі “сол жерде 3-4 күн жатсам, мен өлетін едім” дейді. “Ойбуй, өліп қалыпты деп, мені шығарып жататын едіңдер” дейді. Ол үйден бір аруақ қолдап қашып шықты. Не жазығы бар?! Баға алмаса, берсін, басқа балаларына! “Қайтып келсең, өлтірем” деді баласы. Мен оған жіберем βе?! Біздің көзімізше, жедел жәрдемнің алдында айтты: “қайтып келсең, өлтіремін”», – деді марқұмның қарындасы.
Әділхан ақсақалдың немересі Сәуле Әділхан да атасының бүгінгі күйіне алаңдаушылық білдіріп, қарттың ешкімге салмақ салмай, өздігінен жүріп-тұрғанын, сотқа өз аяғымен барып, барлық шындықты өз аузымен айтуды армандағанын жеткізді. Ол атасының қазіргі жағдайына қатысты өкінішін жасырмады:
«Ұмытып қалған, ештеңе білмейді. Осыған дейін үш айға дейін соты болғанда бәрін біліп, бәріне жауап берер ме еді? Негізі, күтті, өз аяғыммен сотқа барамын деп күтіп еді. Бұл енді атамызды осындай жағдайға түсіріп тастап тұр ғой», – деді немересі.
Сағыз ауылына лезде тарап кеткен бұл қайғылы оқиға жергілікті тұрғындардың жағасын ұстатты. Әділхан ақсақалдың замандастары өмір бойы адал еңбек етіп, ұрпақ өсірген құрметті ақсақалдың қартайған шағында өз шаңырағынан қашуға мәжбүр болғанына қатты налиды. Қарияның құрдасы Сайфолла Қаженов ел арасындағы түсініспеушілікке қатысты өз ойын білдірді:
«Мұндай жағдай қазақта болып көрмеген. “Әкең жынды болса, байлап бақ” деген қазақ. Бұл тіпті еститін құлаққа ерсі», – деді аксақалдың құрдасы.
Осы шулы іске қатысты «әкесін ұрып-соқты» деп айыпталған Қанат Сисеновпен байланысудың сәті түспеген соң, тілшілер оның ауылдағы үйіне барып іздеді. Осыған дейін бұқаралық ақпарат құралдарымен тілдеспеген күдікті ұл ақпараттардың біржақты таратылып жатқанына наразылық білдіріп, әзірге сот аяқталғанша ешқандай жауап бермейтінін алға тартты. Ол өз сөзінде бұл айыптаулардың барлығын кесіп айтып, басқаша бағалады:
«Мен ұрудан аманмын. Мұның барлығы жала. Қазір оқиғаға қатысты сот әлі біткен жоқ, іс сотта ғой, соған байланысты мен қазір сізге бірдеңе айтатын болсам, сот дұрыс түсінбей қалуы мүмкін. Ертең Интернетте әдейі бізге қысымшылық жасап жатыр деп, сот түсініп қалуы мүмкін. Сол себептен сот аяқталғанша мен сізге ештеңе айта алмаймын», – деді Қанат Сисенов.
Сондай-ақ ол әкесін жиырма жылдан астам уақыт бойы бағып-қаққанын айтып, медициналық сараптама қорытындысында денсаулығына ауыр соққы тимегені жазылғанын жеткізді. Дегенмен, қарияның туыстары мен жақындары істің жан-жақты, әділ әрі ашық тексерілуін қатаң талап етіп отыр. Айта кетейік, қылмыстық оқиға Қызылқоға ауданында орын алғанымен, Атырау облыстық сотының шешімімен бұл іс Жылыой ауданының сотында қаралуда.
