Қазақстанның орта білім беру жүйесінде оқушылардың сауаттылығын арттыру және құқықтық тәрбие беру мақсатында маңызды өзгерістер енгізілмек, деп жазады Alash.kz.
Оқу-ағарту министрі Жұлдыз Сүлейменованың мәлімдеуінше, мектептерде диктант, мазмұндама және шығарма жазу секілді классикалық оқыту әдістері қайта қолданысқа енеді. Сонымен қатар жаңа оқу жылынан бастап балалардың заң алдындағы жауапкершілігін қалыптастыру үшін арнайы құқықтық пәндер тізбегі бекітілді.
Министрліктің бұл қадамы мектеп бағдарламасын заманауи талаптарға сай жаңартудың стратегиялық бөлігі ретінде қарастырылуда. Жазба жұмыстарын қайта жаңғырту оқушылардың ойлау қабілетін дамытып, сөздік қорын байытуға мүмкіндік береді. Дәстүрлі әдістеменің қайта оралуы білім беру сапасын кешенді түрде көтеруге бағытталған маңызды тетіктердің бірі болмақ.
Бұған қоса, «Адал азамат» тұжырымдамасы аясында оқушылардың құқықтық мәдениетін көтеруге баса назар аударылады. Оқу жоспарына сәйкес, 5-7 сынып оқушылары «Конституция негіздері» пәнін меңгерсе, 8-9 сыныптар үшін «Заң және тәртіп» сабақтары енгізіледі. Ал жоғары сынып оқушылары «Құқық негіздері» пәні бойынша білімін тереңдетіп, мемлекеттік заңдарды талдауды үйренбек.
