«Қайрат» пен «Реал Мадрид» ойынына 1000 билет қытайларға сатылып кеткен

Бұл туралы «Ордабасы», «Ақтөбе» және «Тараз» клубтарының экс-қақпашысы, Қазақстан құрамасының бұрынғы футболшысы Самат Отарбаев жазып отыр, деп хабарлайды Alash.KZ.

«Қытайдағы, нақтырақ айтқанда Шанхайдағы адамдар «Қайрат» пен «Реал Мадрид» арасындағы матчқа 1000 билет сатып алған екен. Бұл ресми сатылым басталмай тұрып, клуб басшылығы арқылы жүзеге асқан. Ресми ақпарат жоқ, бірақ шамасы, билетке басқа жолмен де қол жеткізуге болатын сияқты», — деп жазды ол.

Экс-футболшының сөзіне қарағанда, Қытай азаматтары бір билетті шамамен 2 310 000 теңгеге сатып алған. Бұл сомаға ұшақ билеті, қонақүй, тамақ және матч билеті кіреді.

Естеріңізге сала кетейік, бұған дейін «Қайрат» клубы мәлімдеме жасап, билет 23 қыркүйек сағат 17:00-ден бастап қана сатылатынын хабарлаған.

Бір айта кетерлігі, «Қайрат» пен «Реал Мадрид» ойнайтын Орталық стадионға бар болғаны 23 804 адам сияды.