Атырау облысы Исатай ауданының намысын қорғаған жас дарындар Франция астанасында ұйымдастырылған 36-шы халықаралық «Etoile’s de Paris» (Париж жұлдызы) фестиваль-байқауында топ жарды, деп жазады Alash.kz.
Ш. Шәріпов атындағы өнер мектебінің оқушылары әлемнің түкпір-түкпірінен келген қатысушылар арасынан озып шығып, қазақ өнерінің деңгейін халықаралық сахнада паш етті. Ауқымды мәдени шараға Қазақстанның бірнеше өңірімен қатар Франция, Украина, Болгария, Греция және өзге де Еуропа елдерінен барлығы 200-ге жуық бала қатысты.
Байқау барысында қазақстандық өнерпаздар сахнадан өзге, сонымен қатар әуежай төрінде де домбыраның күмбірлеген үнімен француз жұртшылығын тәнті еткен. Кішкентай ауылдан шыққан өрендердің бұл жеңісі өскелең ұрпақ үшін зор үлгі әрі мақтаныш ретінде бағалануда. Шығармашылық ұжымның кәсіби даярлығы мен орындаушылық шеберлігі қазылар алқасының жоғары бағасына ие болды.
Жас таланттардың жетістігімен қатар олардың жетекшісі Әсем Жолдасқызының да еңбегі ерекше аталды. Париждің білікті мамандары қазақстандық педагогтың жұмысына жоғары баға беріп, оның кәсіби біліктілігін ерекше атап өткен болатын. Шетелдік сарапшылар отандық маманның жұмысын өте жоғары кәсіби деңгейде деп танып, оның еңбегіне жылы лебіздерін білдірді.
