Конго елінің шалғайдағы Итури провинциясында Эбола вирусының жаңа өршуі салдарынан 65 адам қайтыс болды. Бұл туралы Associated Press агенттігіне сілтеме жасапAlash.kz хабарлады.
Қазіргі уақытта ауру жұқтырды деген күдікпен 246 жағдай тіркелген. Мамандардың айтуынша, Эбола өте жұқпалы әрі қауіпті дерттердің бірі саналады.
Вирус адам ағзасындағы биологиялық сұйықтықтар арқылы таралады. Сирек кездескенімен, ауру өте ауыр өтеді және көп жағдайда өлімге әкеледі.
World Health Organization өткен жылы Конгода Эболаны емдеуге арналған дәрі-дәрмек қоры және Ervebo вакцинасынан шамамен 2000 доза бар екенін мәлімдеген болатын. Алайда бұл вакцина тек Ebola Zaire штамына қарсы тиімді екені айтылды.
Africa CDC жаңа өршудің нақты қай штамнан туындағанын анықтайтын зерттеу нәтижелері алдағы 24 сағат ішінде жарияланатынын хабарлады.
Еске салайық, бұған дейін теңіз лайнерлерінде Хантавирус өршігені туралы да ақпарат тараған еді. Аргентинадан Кабо-Вердеге бағыт алған MV Hondius круиздік кемесінде инфекциядан үш жолаушы көз жұмған болатын.
