АҚШ пен Иран Ормуз бұғазы маңында бір-біріне соққы жасап, екі ел арасындағы шиеленіс қайта күшейді. Америка тарапы мұны Иранның шабуылдарына жауап деп түсіндірсе, Тегеран бітімді бірінші болып Вашингтон бұзды деп айыптап отыр, деп жазды Alash.kz.
АҚШ-тың Таяу Шығыстағы өңірлік қолбасшылығы — CENTCOM мәліметінше, америкалық қарулы күштер Иранның «себепсіз шабуылдарының» бетін қайтарып, өзін-өзі қорғау аясында жауап соққыларын жасаған.
Иран әскері америкалық әскери кемелерге шабуыл жасағанын растады. Алайда олар АҚШ-ты ирандық мұнай танкеріне соққы жасады деп айыптады.
Америкалық нұсқа бойынша, 7 мамыр күні АҚШ әскери-теңіз күштерінің зымырандық эсминецтері Ормуз бұғазы арқылы Оман шығанағына бет алған. Сол сәтте Иран тарапы бірнеше зымыран ұшырып, дрондар мен шағын катерлерді пайдаланған.
Вашингтон қауіптердің «бейтараптандырылғанын» және шабуылдарға қатысы бар Иранның әскери нысандарына, соның ішінде зымыран және дрон ұшыру қондырғыларына, басқару орталықтарына және барлау бекеттеріне соққы жасалғанын мәлімдеді.
Donald Trump бұл жағдайға қатысты бітімнің әлі де күшінде екенін айтты.
«Жоқ, жоқ, бітім әлі күшінде. Ол сақталып тұр», – деген Трамптың сөзін ABC арнасының журналисі Rachel Scott жеткізді.
Ал Иранның мемлекеттік Press TV телеарнасы америкалықтар Иранның жағалау суларынан шыққан мұнай танкеріне шабуыл жасап, бітімді бірінші болып бұзды деп хабарлады.
Сондай-ақ Иран тарапы АҚШ-ты жағалаудағы азаматтық аудандар мен Кешм аралына әуеден соққы жасады деп айыптап отыр. Тегеран бұған жауап ретінде Ормуз бұғазының шығыс бөлігіндегі америкалық әскери кемелерге шабуыл жасағанын мәлімдеді.
