Алматы маңындағы таулы аймақта жасөспірім биіктігі шамамен 15 метр болатын жардан құлап, ауыр жарақат алды, деп хабарлайды Alash.kz.
Оқиға «Үш Ағайынды» шыңынан түсу кезінде болған. Құтқарушылардың мәліметінше, үш жасөспірім таудан түсу барысында бағдардан жаңылып, бірі жардан құлап, есінен танып қалған. Оқиға туралы хабар кезекші бөлімге сағат 16:50-де түскен. Зардап шеккен жасөспірімге тек сағат 21:46-да жету мүмкін болған.
Болжам бойынша, оның иығы, шынтағы, жамбас сүйегі сынған және омыртқасына зақым келген болуы мүмкін. Жағдайының ауырлығына байланысты оны жер арқылы тасымалдау мүмкін болмаған.
Құтқарушылар зардап шеккен баланы эвакуациялау үшін тікұшақ шақырған. Жасөспірім Алматыдағы №1 қалалық балалар клиникалық ауруханасына жеткізілді. Қазір дәрігерлер оған қажетті медициналық көмек көрсетіп жатыр. Жағдайы — ауыр.
