Швецияда ересектерге арналған оқу орталығында атыс болып, 10-ға жуық адам қаза тапты, деп хабарлайды Alash.kz.
Швецияның Эребру қаласында балалар мектебінің жанында орналасқан ересектерге арналған оқу орталығында атыс болып, 10-ға жуық адам қаза тапты.
Қалалық полиция басшысы Роберто Эйд Форест оқиға салдарынан шамамен 10 адамның қаза тапқанын растады.
Марқұмдар арасында шабуыл жасаған адамның өзі де болуы мүмкін. Дегенмен полиция нақты құрбандардың санын әлі жариялаған жоқ.
Шабуыл жасаған адам туралы ақпарат өте аз. Ол бұған дейін полиция назарына түспеген, ешқандай ұйымдасқан қылмыстық топқа мүше болмаған және ешқандай лаңкестік топтармен байланысы жоқ.
“Біз қылмыскердің жалғыз өзі әрекет еткенін болжап отырмыз”, – деді Форест. Оның айтуынша, бұл “аса қайғылы оқиға” және тергеу әлі бастапқы кезеңде тұр.
Швеция премьер-министрі Ульф Кристерссон төтенше шақырылған баспасөз мәслихатында бұл оқиғаны ел тарихындағы ең ауыр мектептегі атыс деп атады.
Швецияның әділет министрі Гуннар Строммер де бұл ел тарихындағы ең ірі мектептегі атыс екенін атап өтті.
Министр шабуылдаушының қаза тапқандардың бірі екенін растады.
