Мемлекет басшысы Қасым-Жомарт Тоқаев қоғамдағы мінез-құлық мәдениеті мен ұлттық дәстүрлерді жаңғыртудың маңыздылығына тоқталып, ел азаматтарын тәртіп пен тазалық әдебін сақтауға шақырды, деп хабарлайды Alash.kz.
Бұл туралы Президент Құрылтай сайлауында дауыс бергеннен кейін журналистердің сұрағына берген жауабында айтты. Шара барысында «Казахстанская правда» газетінің тілшісі Юлия Магер Мемлекет басшысына азаматтардың жүріс-тұрысының жаңа мәдениеті мен қоғамдық этикасын қалыптастыру бастамасына қатысты сауал қойған болатын. Журналист өз сұрағында өзгелерге құрмет көрсету, заң мен тәртіпті сақтау, жауапкершілік таныту сияқты қасиеттердің ел азаматтарының күнделікті дағдысына айналу мүмкіндігі туралы сұрады.
Білсеңіз, бұл іске өзім бастамашы болдым. Науқанға емес, нақты іске. Өйткені жастардың, егде адамдардың жүріс-тұрысына қарап, байырғы дәстүрлі құндылықтарымызға оралу қажет деген шешімге келдім. Ер адамдардың бір-бірін құшақтап, сүйіп амандасуы, сәлемдесу барысында әйелдердің еркектерді, еркектердің әйелдерді бетінен сүюі дұрыс емес. Біздің салт-дәстүрімізде мұндай ешқашан болмаған. Әсіресе, әскери форма кигендердің, генералдардың осылай істегені көзге оғаш көрінеді. Бұл не масқара? Кеңес Одағы маршалының, Дүниежүзілік соғыста, Ұлы Отан соғысында жеңіске жеткен маршалдардың осындай қылық көрсеткенін елестете аласыздар ма? Еркектер қолының ұшын ұстата салмай, қолды қаттырақ қысып амандасуы керек. Сәл жымиса ғана жеткілікті. Әрқашан солай болған. Тіпті, осы адамды көргеніңізге шын мәнінде қуанышты болсаңыз, оң қолыңызды кеудеңізге қойып амандасыңыз. Өмірде мұндай жайт жиі кездеседі. Сондықтан мен жаңа жүріс-тұрыс әдебі туралы мәселе көтердім. Жалпы, бізге тазалық, тәртіп мәдениетін дәріптеу керек. Қолымыздан келмейді деп кім айтты?! Біз де жасыл желекті жақсы көреміз. Қазір Астанада, басқа қалаларда, аудандар мен облыстық маңызы бар шаһарларда оң өзгерістерге куә болып жүрсіздер. Біз өңір басшыларына жоғары талап қойдық. Осы іспен түпкілікті айналысамыз. Өйткені тазалық дегенді тура мағынасында ғана емес, ой-сананың, жан дүниенің тазалығы деп түсінген жөн. Белгілі тұлғалардың бірі айтқандай, ой тазалығы бой тазалығымен де ұштасқаны жөн. Яғни біз мәдениетті, таза ұлтқа айналуымыз керек. Сонда ғана күллі әлемге таныламыз.
