Николас Мадуроның АҚШ-тағы сот процесіне қатысты жаңа ақпарат тарады

АҚШ-тың Нью-Йорк қаласындағы Оңтүстік округтің федералдық соты Венесуэланың бұрынғы президенті Николас Мадуро мен оның жұбайы Силия Флореске қатысты сот процесін 2027 жылғы 1 маусымда бастауды белгіледі, деп жазады Alash.kz.

Оларға есірткі саудасына және есірткі терроризміне қатысы бар деген айып тағылып отыр. АҚШ билігінің мәліметінше, Мадуроға төрт айып тағылған, оның ішінде АҚШ аумағына кокаин жеткізу мақсатында сөз байласты деген айып бар. Егер кінәсі дәлелденсе, оған өмір бойына бас бостандығынан айыру жазасы тағайындалуы мүмкін.

Жергілікті бұқаралық ақпарат құралдарының хабарлауынша, сот процесін 2027 жылдың маусымында өткізуді айыптау тарапы да, қорғаушылар да қолдаған. Мадуроның адвокаты Барри Поллак мұндай кестені шынайы әрі іске асыруға болатын мерзім деп бағалады.

Сонымен қатар қорғау тарапы бұл істің заңдылығына күмән келтірмек. Адвокаттар Мадуро егемен мемлекеттің басшысы ретінде иммунитетке ие болғанын алға тартып, істі тоқтатуды сұрауды жоспарлап отыр.

Тараптардың өтініштері қаралатын сот отырысы 2026 жылғы 17 қарашаға белгіленген. Ал сот процесінің түпкілікті кестесін сот кейінірек бекітеді.

Николас Мадуро мен Силия Флорес 3 қаңтарда Каракаста америкалық арнайы жасақ қызметкерлерінің қолына түсіп, кейін Нью-Йоркке жеткізілген. Кейін оларға ресми айып тағылды. Екеуі де өздеріне тағылған айыптарды жоққа шығарып отыр.