Атыраудағы психологиялық-педагогикалық түзету кабинетіне барған ерекше баланың анасы ұлының мекеме ішінде соққыға жығылып, дене жарақатын алғанын мәлімдеді, деп жазады Alash.kz.
Келеңсіз жағдайға тап болған бүлдіршін небәрі 2 жас 10 айлық. Оған медициналық тұрғыда психологиялық-сөйлеу дамуының тежелуі (ПСДТ) және зейін тапшылығы мен гиперактивтілік синдромы (ЗТГС) диагноздары қойылған. Ағымдағы жылдың 17 маусымында анасы баласын сағат 14:00-ден 16:20-ға дейінгі уақыт аралығында арнайы сабақтарға қалдырып кеткен. Алайда, белгіленген уақытта ұлын алып кетуге келген сәтте, оның сол жақ білегінің ішкі бөлігінен біреудің бес саусағының қатты батқан іздері мен сырылған тырнақ орындарын байқайды. Сол күні-ақ арнайы травматолог маманның тексеруінен өткеннен кейін ресми медициналық анықтама берілді. Дәрігерлер балаға сол жақ білегінің жұмсақ тіндерінің соғылуы деген диагноз қойып, құжатқа білектің ішкі жағында жергілікті қан құйылудың бар екенін нақты жазып көрсеткен.
Орталықтың басшылығы мен қызметкерлері бұл оқиғаны өзінше ақтауға тырысты. Олардың уәжіне сүйенсек, күн тәртібіндегі соңғы сабақты жүргізуі тиіс маман жұмыстан ерте кетіп қалған, содан кейін бала тәрбиешінің бақылауымен ойын бөлмесінде қалдырылған. Көп ұзамай бүлдіршін дәлізге шығып, еденге жатып алған көрінеді. Мекеме қызметкерлері тәрбиешінің баланы тек бөлмеге қайтару мақсатында ғана «жай ғана қолынан ұстағанын» алға тартты. Дегенмен, мұндай жауаптар мен сылтаулар баланың анасын мүлде қанағаттандырмады. Бүлдіршіннің анасы сәбиінің не жағдайды өткергенін өзі айтып бере алмайтынына налиды. Қазіргі уақытта осы оқиғаның ақ-қарасын анықтау үшін тиісті тексеру амалдары жүргізіліп жатыр.
