Қарағандыда дүкен иесін өлтірді деп айыпталған 51 жастағы сарандықтың ісі сотта қаралуда, деп хабарлайды ALASH.KZ.
Tengrinews.kz хабарлауынша, Қарағандыда Саран қаласының 51 жастағы тұрғыны, жергілікті дүкен иесіне қарақшылық шабуыл жасап, оны өлтірді деген айыппен сот алдында жауап беріп жатыр.
Шабуыл хронологиясы
Қанды қарақшылық шабуыл 2025 жылдың қаңтар айында болған.
22 қаңтар күні таңертең, дүкен ашылғаннан кейін 40 минут өткенде, бетперде мен камуфляж киген, қолында пышағы бар ер адам минимаркетке кіріп келген. Ол бірден кассаға қарай бет алып, онда тұрған дүкен иесіне тап берген. Әйел адам қарсылық көрсетпек болған, бірақ бұл оның өміріне қауіп төндірді – күдікті оны пышақтап өлтірді.
Оқиға дүкеннің бейнебақылау камераларына түсіп қалған және бұл видео кейін әлеуметтік желілерге тарап, қоғамда үлкен резонанс тудырды.
Қылмыстық іс Қарағанды облыстық мамандандырылған ауданаралық қылмыстық істер жөніндегі сотында, судья Бекзат Шалғымбаевтың төрағалығымен қаралуда. Айыпталушы – азаматтығы жоқ, бұрын Саран қаласында туған 51 жастағы ер адам.
Сотта оның бұған дейін бірнеше рет әкімшілік және қылмыстық жауапкершілікке тартылғаны белгілі болды. Бұрын есірткі қолданған. Ал соңғы кездері, өз сөзінше, қоғамдық бірлестікте аутрич-маман болып жұмыс істеген, яғни салауатты өмір салтын насихаттаумен айналысқан.
Психикалық сараптама нәтижелері
Сотта прокурор Жанкөзы Нақышев сот-медициналық сараптаманың қорытындыларына сүйене отырып, айыпталушының есірткі заттарын қолдануына байланысты психикалық және мінез-құлықтық ауытқулар болғанын айтты.
Алайда сол сараптама оның қылмыс жасаған сәтте өз әрекеттеріне есеп бергенін де көрсеткен.
22 қаңтар күні айыпталушы үйінен қара сапты аңшы пышағын алып, дүкенге келген.
Алдымен дүкенде сатушыдан басқа ешкім жоқ екеніне көз жеткізіп, темекі алу сылтауымен ішке кірген.
Содан кейін ішкі жағынан есікті жауып, бөтен адамдардың кіруін болдырмау үшін оны іштен бекіткен.
Пышақты қынабынан шығарып, оң қолына алып, сатушы тұрған касса жаққа барған.
Сол сәтте дүкен иесі айқайлап, көмек сұрап, қарсылық көрсетіп, оны есікке қарай итере бастаған.
Қысқа ғана қақтығыс барысында айыпталушы әйелге бірнеше пышақ жарақатын салған. Бірі кеңірдекке, тағы бірі іш қуысына тиген.
Әйел адам жерге құлап, көп қан жоғалту салдарынан бірнеше минут ішінде жан тапсырған.
Дүкеншіні өлтіріп, айыпталушы кассадағы 180 мың теңгені алып, оқиға орнынан ізін суытқан.
Оны сол күні кешке қарай ұстаған. Үйінің жертөлесін тінту кезінде оның үстінде болған куртка мен аяқ киім табылған. Айыпталушы бастапқыда мұны ақша үшін жасағанын мойындаған.
«Өзі пышаққа түсті»
Алайда сотта ол өз кінәсін мойындамады. Ол «өлтіруге емес, тонауға барғанмын» деп мәлімдеді. Тіпті марқұм әйелдің өзі пышаққа түсті деп айтуға дейін барды.
— Мен сол күні үйден емес, жұмыстан шыққанмын. Тергеушілер маған есірткі беріп, айтқандарын мойындатты. Мен кінәмді мойындамаймын, — деді сотта айыпталушы.
Куәгерлердің сөзі
Сотта бірнеше куәгер жауап берді. Олардың бірі оқиға болған дүкеннің жанындағы автобус аялдамасында айыпталушыны көргенін айтты. Оның сөзінше, айыпталушы «камуфляж» курткамен жүрген, өте қобалжулы күйде болған.
— Ол ары-бері жүріп, қатты қобалжулы көрінді. Мен оны жеке танимын. Жұмыс автобустарын күтіп тұрғанмын. Сол кезде біздің электрик әріптесім дүкенге кіріп, кейін жүгіріп шығып, әйелдің өлтірілгенін айтты. Мен бірден дүкенге жүгірдім. Әйел шалқасынан түсіп, қолдары жан-жаққа жайылып жатты. Қансырап жатты. Тамағында тесік бар еді, көзі қатқан. Ол дем алмай жатты, — деді куәгер.
Тағы бір куәгер сол таңертең айыпталушыны күмәнді жағдайда көргенін айтты:
— Мен кәсіпорында күзетші болып істеймін, камераларды қарап отырамын. Сол күні таңертең сыртқа шығып, қар күреп жүргенімде айыпталушыны көрдім. Ол қарға тізеден кіріп келе жатты, ал 150 метр жерде тап-таза жол болатын. Бір сәтте ол тоқтап, артына бұрылып, мен оның жүзін анық көрдім. Кейін кісі өлтірілгенін естігенде, бұл сол адам екенін бірден білдім, — деді ол.
«Біз жақынымыздан айырылдық»
Судья шабуылдың бейнежазбасын сотта көрсеткенде, марқұмның туыстары көз жасына ерік берді.
— Біз бұл адам өлтіргеніне толық сенімдіміз. Видео бәрін дәлелдеп тұр. Біз бір адаммен бірге қызымыздан, әпкемізден, анасынан, жұбайынан және жақынымыздан айырылдық. Ол жақында ғана осы дүкенді ашқан еді, жолдасы және енесімен бірге еңбек ететін. Екі баласы қалды. Біз осы адамға екі бап бойынша ең ауыр жаза қолданылуын талап етеміз. 20 жылдан кем емес немесе өмір бойына бас бостандығынан айыру.
Сотта ол өте менмен, күліп қарап отырды. Оның жүзінде ешқандай өкініш жоқ. Сондықтан біз оны аяп тұрған жоқпыз. Бізден бірде-бір рет кешірім сұраған жоқ. Бұл адам емес. Біз оған келтірілген моральдық зиян үшін 30 миллион теңге және материалдық шығын ретінде 180 мың теңге өндіруді сұраймыз, — деді марқұмның ағасы Ертай Тілеухабыл.
